“Vetëm grekë në kombëtare”/ Tifozët kundër Durmishajt: Nuk e duam! Shko luaj për vendin tënd…

Sulmuesi vlonjatë, Fiorin Durmishaj ka refuzuar Kombëtaren Shqiptare duke zgjedhur të përfaqësojë Greqinë. Ky vendim i 22-vjeçarit ka bërë një bujë të madhe në mediat shqiptare si dhe ato greke.

Edhe pse bëhet fjalë për një futbollist që është duke shkëlqyer me fanellën e Panioniosit, helenët duket se nuk e kanë mirëpritur aspak zgjedhjen e Durmishajt, raporton “Panorama”. Në një hulumtim të bërë në mediat sportive greke, vihet re se reagimi i sportdashëve grek për ish-sulmuesin e Kombëtares Shpresa, nuk ka qenë aspak dashamirës, duke nxjerrë në pah, krenarinë e tyre të tepërt.

“Vetëm grekë në kombëtare! Durmishaj nuk ka vend këtu, duhet të shkoj të luaj me vendin e tij”, shkruanin një pjesë e madhe e tifozëve greke në rrjetet sociale.