Vetëm mëngjesin e sotëm, mbi 5 mijë qytetarë të Kosovës kanë hyrë në Shqipëri

Shqipëria vijon të mbetet vendi i preferuar i shtetasve të Kosovës. Në orët e para të mëngjesit të sotëm, Policia kufitare në Shqipëri njofton se kanë hyrë mbi 5 mijë kosovarë.

“Gjatë mëngjesit të sotëm ka pasur një fluks të madh të qytetarëve kosovarë në drejtim të Shqipërisë, ku vetëm orët e parë të mëngjesit kanë hyrë mbi 5000 shtetas”, thuhet në njoftim.

Përmes një njoftimin në Facebook nga Policia në Shqipëri, thuhet se Drejtori i Përgjithshëm i Policisë së Shtetit Ardi Veliu, në orët e para të mëngjesit të sotëm, ka inspektuar Pikën e Kalimit të Kontrollit Kufitar Morinë. Policia kufitare ka shtuar masat me qëllim krijimin e lehtësirave për shmangien e radhëve të gjata si pasojë e fluksit.

“Drejtori Veliu u ka kërkuar punonjësve të Policisë kufitare angazhim maksimal dhe performancë duke iu ofruar qytetarëve një shërbim sa më cilësor. Ai porositi drejtuesit e Policisë kufitare në Morinë që në raste fluksi të aplikojnë procedurë të përshpejtuar, por nga ana tjetër punonjësit e policisë të ushtrojnë kontroll në vijën e dytë për të gjitha mjetet që dyshohen për paligjshmëri”, thuhet në njoftim.

Veliu gjatë bisedës me drejtuesit e Policisë kufitare u kërkoi atyre që gjatë sezonit shërbimet e policisë qoftë për pikën e Morinës, qoftë për kufirin e gjelbër të jenë të angazhuara maksimalisht në shërbim të qytetarëve dhe në parandalimin dhe goditjen e paligjshmërisë.

“Çdo ditë në këtë pikë kalojnë deri në 25 000 shtetas kosovarë dhe deri në 4000 makina, pra aktualisht vendkalimi i Morinës, është vendkalimi që përballon ngarkesën më të madhe në të gjithë vendkalimet e Shqipërisë dhe ne kemi vëmendje të shtuar këtu që për të gjithë pushuesit të krijohen gjithë lehtësirat e nevojshme, me qëllim që të minimizohet siç thashë pak më parë, koha e pritjes dhe të vazhdojë lëvizja sa më shpejt drejt vendit tonë.”

Gjithashtu Veliu ka kërkuar rritje të patrullimit në kufirin e gjelbër, pasi në sezone apo raste fluksesh tendenca për të zhvilluar paligjshmërinë orientohet në kufirin e gjelbër.

Gjatë inspektimit Veliu ka takuar edhe punonjësit e Policisë kufitare të Kosovës. Aty është njoftuar se kanë hyrë në Shqipëri mbi 5 mijë kosovarë.

“Ne kemi marrëveshje bashkëpunimi jo vetëm me Policinë e Kosovës, por dhe me Policinë e Maqedonisë, po kështu jemi duke implementuar patrullat e përbashkëta në të gjithë territorin e RSH. Patrullat e përbashkëta janë duke mirëfunksionuar. Në dallim nga vitet e tjera shtrirja e këtyre patrullave nuk është vetëm në qarkun e Lezhës, Shkodrës, Durrësit, por ka zbritur dhe në qarkun e Vlorës dhe ne jemi absolutisht shumë të kënaqur nga ky bashkëpunim dhe këto patrulla janë jashtëzakonisht efiçente.”/Monitor/