Vetëm për tri javë, 80 të vdekur nga temperaturat e larta

Vala e të nxehtit që ka përfshirë Japoninë ka marrë 80 jetë njerëzish ndërsa 35.000 kanë përfunduar në spital për vetëm tri javë, theksojnë të dhënat zyrtare që sot u bënë publike.

Java e kaluar, kur temperatura u shënua mbi 35 gradë Celsius, ishte dhe java më vdekjeprurëse që mori jetën e 65 personave, thekson Agjencia japoneze për menaxhimin e zjarreve dhe katastrofave. 15 të vdekur u shënuan në dy javët tjera.

Me temperaturën prej 35 deri në 40 gradë Celsius dhe lagështi më të madhe se 80 për qind, për shumë qytete japoneze është kombinim vdekjeprurës i cili shkatërron natyrën.

“Po shënojmë një temperaturë të paparë në disa rajone,” sqaroi zyrtari i Agjencisë meteorologjike, Motoaki Takekawa duke shtuar se kjo valë e të nxehtit është fatale dhe vlerësohet si katastrofë natyrore.

Masat për mbrojtjen e fëmijëve

Shumica e rasteve të vdekjes ka ndodhur ndër moshat e treta, por ka edhe raste të vdekjeve të fëmijëve, ndër të cilët edhe një 6-vjeçar i cili u godit nga vala e të nxehtit sapo hyri në klasën e shkollës së tij, ku ajri nuk ishte kondicionuar.

“Masat për mbrojtjen e fëmijëve janë urgjente,” tha sot zëdhënësi i Qeverisë së Japonisë, Yoshihide Suga.

Qeveria ka vendosur të subvencionoj instalimin e kondicionerëve në shkollat fillore dhe ato të mesme nga viti i kaluar. Deri më 1 prill të vitit të kaluar, në më pak se gjysmën e klasave të shkollave shtetërore ishin instaluar kondicionerët.

Madje po shqyrtohet edhe zgjatja e pushimeve të shkollës, tha Suga.