Presidenti i Kosovës Hashim Thaçi, ka paralajmëruar një tryezë me të gjitha partitë politike për javën e ardhshme, për të gjetur rrugë për krijimin e një grupi të unitetit për fazën finale të dialogut me Serbinë. Por, Vetëvendosje dhe Lidhja Demokratike e Kosovës kanë thënë se nuk do të jenë pjesë e këtij ekipi përderisa në krye të negociatave është presidenti Thaçi. Dhe, sipas tyre, Kuvendi duhet ta drejto dialogun.

Ekipi i Unitetit

Kjo është vetëm një nga thirrjet e shpeshta që presidenti i Kosovës Hashim Thaçi  në çdo paraqitje para medieve u bënë ftesë partive politike, pozitë e opozitë, që të jenë pjesë e ekipit të Unitetit për dialogun me Serbinë.

Dy herë brenda kësaj jave Thaçi ka përsëritur një kërkesë të tillë, njërën nga presidenca ku u paraqit në një konferencë për medie, e të fundit e ka bërë gjatë raportimit në qeveri për procesin e dialogut me Serbinë.

Assesi dy partitë më të mëdha opozitare Lidhja Demokratike e Kosovës e as Lëvizja Vetëvendosje nuk po binden që të jenë pjesë e ekipit të unitetit.

Zyrtarë të këtyre dy subjekteve kanë insistuar se faza finale e dialogut me Serbinë duhet të udhëhiqet nga Kuvendi i Kosovës e jo nga presidenti Hashim Thaçi.

Xhelal Sfeçla nga VV ka kundërshtuar idenë e presidentit Thaçi, edhe pse sipas tij, është i rëndësishëm për të biseduar për procesin e dialogut me Serbinë.

Ai shtoi se në këtë Grup të Unitetit, nuk duhet të jetë presidenti I vendit.

Qëndrim të njëjtë kanë edhe zyrtarë të LDK-së të cilët deri më tash kanë qëndrim të betonuar për idenë që të krijohet grupi i Unitetit për dialogun me Serbinë.

Ndryshe, qeveria e Kosovës ka tërhequr platformën për dialogun nga Kuvendi i Kosovës duke i hapur rrugë kështu partive politike në vend që të gjejnë një gjuhë të përbashkët për tema të mëdha përfshirë edhe dialogun me Serbinë.

Deri tani janë mbajtur katër takime të partive politike, por që deri tani nuk ka asnjë rezultat konkret.