Vetëvendosje “Kundër PANhajnisë” në Mitrovicë
Pas Vushtrrisë dhe Llapit, Lëvizja “Vetëvendosje” ka mbajtur sot tubim në Mitrovicë me moton “Kundër PANhajnisë”, duke kërkuar ndryshim dhe zgjedhje të reja.
Kryetari i Lëvizjes “Vetëvendosje”, Albin Kurti, tha se me shtetin e kapur Kosova nuk është as vend i drejtësisë dhe as i mundësisë për qytetarët e saj . Zgjedhjet e reja janë mundësia, tha Kurti, kurse qeverisja e re është garancia.
“Ne kemi nevojë për ndryshim. Kemi nevojë për solidaritet midis të rinjve dhe të moshuarve, për solidaritet midis gjeneratave aktuale dhe brezave të ardhshëm. Kjo nënkupton para se gjithash kujdes për ambientin, borxhin publik, arsimimin dhe për infrastrukturën. E për këtë e shumëçka tjetër, për këtë e gjithçka tjetër, zgjedhjet e reja janë mundësia, kurse qeverisja e re është garancia.”
Në këtë tubim përveç kryetarit Albin Kurtit morën pjesë struktura dhe deputetë të Parlamentit të Kosovës nga Lëvizja Vetëvendosje, kryetari i komunës së Mitrovicës Agim Bahtiri, si dhe shumë qytetarë të tjerë.
