Vetëvendosje mbledh nënshkrimet për thirrjen e seancës për Presidentin
Lëvizja Vetëvendosje, e kryeministrit Albin Kurti ka mbledhur 40 nënshkrimet e nevojshme që të thirret seanca e jashtëzakonshme e Parlamentit, për zgjedhjen e presidentit të ri, raporton RFE.
Ndërkohë sot Parlamenti i Kosovës miratoi përbërjen e Komisioneve parlamentare, ku Lëvizja Vetëvendosje do të kryesoj 7 prej 14 komisioneve, sa janë gjithsej.
“Me 104 vota për, asnjë kundër dhe asnjë abstenim, kuvendi e miratojë përbërjen e 14 komisioneve parlamentare për legjislaturën e tetë të Kuvendit të Kosovës,” tha Kryetarii Parlamentit, Glauk Konjufca.
Kështu, si grupi më i madh parlamentar, Lëvizja Vetëvendosje do të kryesoj shtatë komisione, nga dy komisione Partia Demokratike e Kosovës dhe Lidhja Demokratike e Kosovës ndërsa nga një komision do të kryesojë Aleanca për Ardhmërinë e Kosovës, Lista Srpska dhe Grupi 6 plus.
LVV do të kryesoj: Komisionin për buxhet, punë dhe transfere, Komisionin për legjislacion, mandate dhe imunitete, Komisionin për arsim, shkencë, teknologji, kulturë, rini, sport, inovacion dhe ndërrmarrësi, Komisionin për bujqësi, zhvillim rural, mjedis dhe planifikim hapësinor, Komisionin për punë të jashtme dhe diasporë, Komisionin për qeverisje lokale zhvillim rajonal dhe media, si dhe Komisionin për shëndetësi dhe mirëqenie sociale.
PDK: Komisionin për ekonomi, punësim, tregti, industri, ndërmarrësi dhe investime strategjike si dhe Komisionin për mbikëqyrjen e Agjencisë së Kosovës për Inteligjencë.
LDK: Komisionin për integrime evropiane dhe të për mbikëqyrjen e financave publike.
Ndërkaq, AAK do të kryesoj Komisionin për çështje të sigurisë dhe mbrojtjes, Lista Srpska atë për të drejtat e komuniteteve dhe kthim, ndërsa Grupi 6 plus Komisionin për të drejtat e njeriut, barazi gjinore, persona të pagjetur dhe peticione.
Për postin e presidentit, Lëvizja Vetëvendosje ka propozuar Vjosa Osmanin.
Osmani, ish-zyrtare e Lidhjes Demokratike të Kosovës, në zgjedhjet e 14 shkurtit garoi në listë të përbashkët me LVV-në dhe mori më së shumti vota, përkatësisht, mbi 300 mijë.
Ish-partia e saj, LDK-ja, që është në opozitë, gjatë kësaj jave ka thënë se do të marrë pjesë në votimin e presidentit.
Kundër zgjedhjes së Osmanit janë deklaruar partitë opozitare, Partia Demokratike e Kosovës dhe Aleanca për Ardhmërinë e Kosovës. Ndërkaq, mbështetje për Osmanin kanë shprehur partitë e komuniteteve joserbe.
Pas drëzimit të 40 nënshkrimeve të 40 deputetëve, pritet që Kryesia e Parlamentit të caktoj kohën e mbajtjes së seancës për zgjedhjen e Presidentit të Kosovës.
Për zgjedhjen e presidentit, në dy raundet e para nevojiten dy të tretat ose 80 vota të deputetëve. Ndërkaq, në raundin e tretë, president zgjidhet me shumicën e thjeshtë prej 61 deputetësh, por bazuar në një Vendim të Gjykatës Kushtetuese në seancë duhet të marrin pjesë të paktën 80 deputetë.
Nëse edhe raundi i tretë dështon, vendi shkon në zgjedhje të jashtëzakonshme të cilat duhet të mbahen brenda 45 ditësh.
Ndryshe, që prej 5 nëntorit, 2020, Kosova është me ushtrues detyre të presidentit, pasi Hashim Thaçi dha dorëheqje nga kjo pozitë pas konfirmimit të aktakuzës për krime lufte dhe krime kundër njerëzimit nga Dhomat e Specializuara në Hagë. Këtë post e ushtroi Vjosa Osmani dhe pas zgjedhjes në krye të kuvendit, Glauk Konjufca mori edhe detyrën e ushtrimit të postit të presidentit.
