Vetëvendosje në Gjilan, Schwartze: Kam ardhur ta mbështes Albinin kryeministër

Kandidati për Kryeministër, Albin Kurti, përveç çlirimit të shtetit nga kapja, gjyqtarët e prokurorët nga eprorët lepurushë, gratë nga dhunuesit, punëtorët nga shfrytëzimi e veteranët nga mujsharët e luftës, ai u zotua në Gjilan se do ta sjell ligjin e ri të punës.

“Do ta themelojmë gjykatën e punës dhe qeveria jonë do të jetë komplementare e bashkëpunuese në përpjekjet e sindikatave në përmirësimin e kushteve të punës e të drejtave të punëtorëve e kurrsesi pengesë për ta. Kosovën e kemi trashëgim nga gjaku i dëshmorëve dhe djersa e punëtorëve ndërkaq e kemi marrë hua nga fëmijët e porsalindur e ata që akoma nuk kanë lindur. Gjithkah duhet të punojmë, gjithçka duhet të shpëtojmë e shumëçka do të fitojmë.”

Në hapje, tubimin e nderoi deputeti i Partisë Social-Demokrate në Bundestagun gjerman, Stefan Schwartze, i cili u shpreh qartë se ka ardhur në Kosovë për ta mbështetur Kurtin për kryeministër.

“Unë jam këtu sot sepse mendoj se ju qëndroni përpara një momenti historik. Besoj se e keni shansin e madh për ndryshimin e madh në Kosovë. Në këto zgjedhje varet edhe perspektiva e ardhshme e Kosovës”, tha deputeti gjerman duke shtuar se, se ashtu sikur ai shpreson dhe qytetarët e kanë guximin ta mbështesni Albinin për kryeministër, raporton KTV.

Ndërkaq kandidati për deputet Nevzad Isufi, tha se bashkë me qytetarët, Lëvizja po kërkon ndryshim, zhvillim, shtet, parime, barazi e mirëqenie të cilat kanë munguar deri në 6 tetor, sepse sipas tij, një epokë e re po vjen.

Sipas tij Gjilani pa ujë e me lumenj e ambient të ndotur do ta ketë përkrahjen e qeverisë Kurti për ta mbrojtur mjedisin e për t’ia siguruar shërbimet bazike publike.

Kandidatja për deputete Arijeta Rexhepi, u zotua se Lëvizja do të punojë për një vend ku mund t’i paramendojmë fëmijët tanë të rriten, jetojnë e punojnë me dinjitet në vendin e tyre.

Kandidati Alban Hyseni tha se vetingu do të bëhet e do të jetë gardian i përhershëm i sistemit të drejtësisë e sigurisë, duke thënë më tutje se drejtësia e barazia janë baza dhe thelbi i rendit dhe i rregullit në shoqëri dhe drejtësia e barazia do të shërbejnë si rregullatorë të fushave të tjera në shoqërinë tonë pas 6 tetorit

Ndërsa kandidatja për deputete Tinka Kurti si aktiviste e zëshme e çështjes së gruas, denoncoi dhunën, shfrytëzimin, izolimin dhe përjashtimin e grave nga sfera publike e jetës e tha me bindje se ditë të bardha po na presin vendin pas 6 Tetorit.