Vetëvendosje proteston: “Një popull s’i nënshtrohet një njeriu”

​Lëvizja Vetëvendosje do të mbaj sot një protestë paqësore me moton “Një popull s’i nënshtrohet një njeriu”.

Vetëvendosje ka akuzuar se presidenti Hashim Thaçi po dëshiron t’ia japë Serbisë edhe Ujmanin e Trepçën, gjë që siç kanë thënë ata nuk mund ta lejojnë.

“Protesta e sheshi bëhen hapësirat e vetme dhe të domosdoshme për të shprehur bindjet dhe vullnetin tonë në mbrojtje të vendit”, thuhet në njoftimin e Vetëvendosjes.

Protestuesit janë nisur nga qytete të ndryshme drejtë kryeqytetit, ku dhe fillon protesta në orën 14:00 te Biblioteka Kombëtare për të vazhduar në sheshin ‘Skënderbeu”, dhe do të përfundojë me një koncert në sheshin “Zahir Pajaziti”.