Vetingu në politikë ka legjislacion, Gjiknuri: Për Reformën zgjedhore, presim opozitën!
Sekretari i Përgjithshëm i Partisë Socialiste, Damian Gjiknuri, sot u shpreh qartë se për vettingun në politikë Shqipëria ka legjislacion të mjaftueshëm për pastërtinë e figurës ndërsa për Reformën Zgjedhore ai tha se PS pret të vijë opozita dhe të caktohen grupet e punës.
“Unë e dhashë përgjigjen time pak më parë. Shqipëria ka legjislacion të mjaftueshëm për të bërë pastërtinë e figurës së politikanëve. Ne kemi ILDKPI për deklarimin e pasurisë, është ligji i dekriminalizimit si dhe është dhe vota e qytetarëve në fund,” tha Damian Gjiknuri duke sqaruar dhe pozicionin e Partisë Socialiste për Reformën Zgjedhore.
“Unë në fakt pres të vijë opozita dhe të caktojnë dhe njerëzit e tyre për Reformën Zgjedhore. Ka një eksperiencë si nis Reforma Zgjedhore, ajo nis nga rekomandimet e OSBE-ODHIR. Ne i kemi tashmë rekomandimet e OSBE-ODHIR dhe le të fillojmë nga puna,” tha Sekretari i Përgjithshëm i Partisë Socialiste, Damian Gjiknuri, dhe duke iu përgjigjur interesit të mediave shtoi se PS është e gatshme të futet në garë në të gjitha bashkitë, ku do të shpallen zgjedhjet lokale nga Gjykata Kushtetuese dhe që do të dekretohen nga Presidenti.
