Vetting/ Donika Prela në KPK, Çlirim Gjata: Shkeli ligjin, duhet të largohet….
Sekretari për Çështjet Ligjore në PD, Çlirim Gjata, duke reaguar pas seancës dëgjimore në Komisionin e Pavarur të Kualifikimit, KPK, për drejtuesen e Prokurorisë së Krimeve të Rënda, Donika Prela, ku u zbulua se për disa vite, bashkëshorti i saj nuk ka paguar taksat mbi pagën pasi ka punuar në të zezë si inxhinier ndërtimi në një kompani private, thekson se Prela duhet të largohet nga detyra pasi ka shkelur ligjin.
“Kjo është një shkelje shumë e rëndë ligjore dhe Prela s’duhet të qëndrojë në detyrë vetëm për atë shkak,” tha Gjata ndërsa foli edhe për arsyetimin e Donika Prelës gjatë debatit me përfaqësuesin e ONM-së, kur u shpreh se ajo dhe bashkëshorti i saj kishin jetuar në Shqipëri dhe jo në ndonjë vend të BE-së, ku marrëdhëniet e punës fillojnë dhe mbarojnë në mënyrë të ligjshme.
Kështu, në trajtimin e biznesmenëve para ligjit dhe në vetë seancën e rivlerësimit të njerëzve të drejtësisë po zbatohet një standard i dyfishtë.
“S’është çështja e realitetit, po 2 standarde. Pse për bashkëshortin e Prelës, njishi i drejtësisë, që duhet të zbatojë ligjin e para, nuk zbatohet. Bashkëshorti i saj falet kur s’paguajnë taksat. Pse disa biznesmenë u arrestuan pak ditë më parë për çështje taksash? Biznesmenët që s’kanë përkrahje politike arrestohen,” tha Çlirim Gjata duke shtuar:
“Pse falet në këtë mënyrë? Sepse ka dosje që mban mbyllur në favor të pushtetit, duke filluar nga dosja 339, ku personalitete janë kapur në përgjime për blerje votash. Këto janë shkaqet pse politika dhe kryeministri ndërhyn fort!”
Ndryshe gjatë debatit me përfaqësuesin e ONM, kur u pyet për bashkëshortin që nuk kishte paguar kontributet, e para e prokurorisë së Krimeve të Rënda përveç se me një siguri për të kundërshtuar përfaqësuesin e ONM, I dha leksion edhe për realitetin që ai nuk e njehë në Shqipëri dhe është I ndryshëm nga ai I vendeve të Bashkimit Evropian:“Bashkëshorti im ka nënshkruar një kontratë dhe i është përmbajtur detyrimeve të saj. Legjislacioni shqiptar ngarkon me përgjegjësi punëdhënësin për detyrimet dhe nuk ka asnjë dispozitë që tregon se tatimi në burim mund të paguhet në mënyrë vullnetare”.
