Vetting Politik/ Denoncimi, PD: Ja faktet për Donika Prelën që i fshehë KPK…

Ndonëse kishte dosjen e Donika Prelës me detajet që komprometojnë rëndë Kryeprokuroren e Krimeve të Rënda, Komisioni i Pavarur i Kualifikimit, KPK, heshti gjatë seancës dëgjimore për shumë fakte kriminale që e implikojnë këtë prokurore. Sot Partia Demokratike përmes Sekretarit për Çështje Ligjore, Çlirim Gjata, ka bërë publike detajet nga dosja e prokurores Prela me shkeljet që ajo ka bërë, dosje e cila ndodhet në vetting, pranë KPK dhe kjo nuk i merr në konsideratë, pra, nuk i merr në shqyrtim.

“Nuk është se kemi shpikur diçka të re, nuk kemi bërë ndonjë hetim, thjesht këto janë të gjitha të dhëna që ndodhen në zyrat e Komisionit të Vetingut. Ku qëndron problemi? Çështja është se përse nuk i merr në konsideratë, nuk i merr në shqyrtim KPK? Kemi disa raste, të cilat duhen  hetuar me shumë seriozitet,” tha Gjata duke shtuar se duhet të mbahet i njëjti standard si në rastet e tjera, që Komisioni i Pavarur i Kualifikimit, të mos bjerë standard të dyfishtë.

“Duke filluar me rastin e parë, me një apartament që zonja Prela e ka blerë në “Rrugën Tefta Tashko Koço”, tek një Kompani e quajtur Lim-Em, Administrator i së cilës është në ndjekje penale, është nën hetim po nga Krimet e Rënda,” tha Sekretari për Çështje Ligjore pranë PD, duke sqaruar më tej shkeljen e radhës po me këtë apartament: 

“Çmimi është shumë më i lirë se sa i tregut, është nga 300 deri në 500 euro më i lirë se çmimi i tregut për metër katror, dhe kjo del nga vetë thirrjet që kjo Kompani ka bërë për shitjen e apartamenteve të pallatit të ndërtuar nga kjo, ku të gjitha çmimet shkojnë minimumi nga 250 deri në 500 Euro më shtrenjtë për metër katror se ç’e ka blerë apartamentin zonja Prela,” thekson Çlirim Gjata duke pyetur pse kjo ulje e çmimit pikërisht për këtë Prokurore, e ndodhur në këto kushte.

Dhe jo vetëm kaq! Në zyrat e Vettingut ndodhen edhe rastet tjera. 
“Blerja e apartamentit në Durrës për 1 milionë lek të reja, shitet për 4 milion lek të reja. Apo blerje trojesh, apartamentesh, pronash, më lirë, apo shitje më shtrenjtë, apo shumë më shtrenjtë se ç’është çmimi i tregut. A hetohet këtu për pastrim parash? Apo për fiktivitet, apo për kontrata fiktive? E ka detyrim organi i vettingut ta bëjë këtë. “

Dhe sërish te bashkëshorti i Prokurores Prela, apo më saktë procesi gjyqësor që ai ka hapur me Kompaninë ku ka punuar, për mospagim taksash, për të cilin rast u interesua edhe përfaqësuesi i ONM. 

“Megjithëse për vite me radhë ka përfituar të ardhura dhe s’ka paguar taksa, kujtohet tani, pikërisht, pasi është futur nën proces verifikimi zonja Prela. Bashkëshorti i saj ka hapur një proces gjyqësor kundër kompanisë përkatëse, kompanisë “Bruci”, tek e cila ka punuar, deri në mars 2018. Dhe këtë padi e ka hapur pas 7 vitesh,” tha Gjata duke sqarur se Kodi civil nuk ta jep këtë mundësi që të hapësh një padi të tillë për dëmshpërblim, për pagesë taksash apo sigurimeve pas 7 viteve, pasi është e parashkruar. 

“Nuk e ditka zonja në fjalë si juriste, që bashkëshorti nuk mund të hapë një padi pas shtatë vitesh? Është bërë fiktive, pra vërtetë s’i kemi paguar, por e ka fajin kompania dhe unë po e padis në gjyq. Tani kaq e trashë është gatuar kjo dhe tregon që ka një mbështetje shumë të fuqishme politike të organet e vettingut derisa bën veprime të tilla,” konstaton Seketari për Çështje Ligjore pranë Partisë Demokratike, Çlirim Gjata duke rikujtuar se nëse një prokuror KPK e ka shkarkuar nga detyra sepse kishte bërë një blerje të fshehtë dhe thoshte se jetoj me qira, të njëjtën gjë bën edhe zonja Prela me apartamentin, ndërsa përfundon: 

“Ne nuk kërkojmë asgjë më shumë se sa institucioni i vettingut të mbajë të njëjtin standard për raste të ngjashme.  Ndryshe, këtu ka ndërhyrje politike.”