Vettingu, anëtari i Gjykatës së Lartë kërkon hetim për nxjerrjen e të dhënave konfindenciale

Shkëlzen Selimi, anëtari i shtatë i Gjykatës së Lartë që del përpara Komisionit të Pavarur të Kualifikimit për proçesin e Vettingut, është larguar nga seanca dëgjimore, duke kërkuar një hetim mbi nxjerrjen e disa dokumenteve konfidenciale për të në media.

Por komisioni nuk e pranoi kërkesën e Selimit.

“Pasi u njoha edhe me vendimin e ndërmjetëm, çmoj që vazhdimi i procesit bie ndesh me nenin 6 të Konventës së të Drejtave të Njeriut për proces të paanshëm. Siç e shpjegova dyshimi im nuk është të trupa, por të personat që kanë punuar me raportin e DSIK-së.

Kanë nxjerrë sekret hetimor dhe unë s’jam vënë në dijeni. Ky proçes po zhvillohet vetëm te figura. Mua s’më janë bërë me dije hetimi pasuror dhe aftesitë profesionale.

Unë këtu jam për të mbrojtur dinjitetin tim. Pakkush ka mbajt peshë penale si unë me 15 mijë çështje të tilla mbi shpatulla.

Kam gjykuar çështje penale të jashtëzakonshme. Kam dhënë mbi 15 dënime me burg përjetë. Pasi të largohem ju lutem bëjani ju me dije publikut përgjigjet e mia për konstatimet e hetimit administrativ”, tha Selimi përpara se të largohej nga salla.

Nga 9 anëtarë që ka tani kjo gjykatë, tre janë rikonfirmuar në detyrë, ndërsa tre të tjerë janë shkarkuar.

Edmond Islamaj, Xhezair Zaganjori dhe Ardian Dvorani, janë rikonfirmuar në detyrë, ndërsa janë shkarkuar nga Komisioni i Pavarur i Kualifikimit, Admir Thanza, Tom Ndreca dhe Artan Zeneli.

Trupa gjykuese  ndaj Selimit përbëhet nga Xhensila Pine, Etleda Çiftja dhe Valbona Sanxhaktari.

Shkëlzen Selimi ka një karrierë të gjatë në sistemin gjyqësor. Kujtojmë se ai u dekretua në shtatorin e vitit 2010 nga Presidenti i atëhershëm i Republikës, Bamir Topi.

Kandidatura e tij është kontestuar mjaft fort nga maxhoranca e djathtë në atë kohë, e cila e ankimoi deri në Gjykatën Kushtetuese. Megjithatë, në shtator të vitit 2011 Kuvendi e miratoi emërimin e Shkëlzen Selimit në Gjykatën e Lartë.