Vettingu në Polici/ Lleshaj e bindë Parlamentin se Presidenti është paranojak, rrëzohet Dekreti!
Parlamenti i Shqipërisë ka rrëzuar sot me 79 vota kundër, Dekretin e Presidentit të Republikës për vettingun në polici.
Ky votim erdhi pas një parashtrimi të Ministrit të Brendshëm, Sandër Lleshaj, në Komisionin e Sigurisë ku u shqyrtua Dekreti i Presidentit për kthimin e “Ligjit të Vetingut në Policinë e Shtetit”, ku ai u shprehë se “është një paranojë të paragjykosh ministrinë e Brendshme. Gjithashtu, as pavarësia e vetingut nuk është prekur. Ligji është kalimtar, ndërsa vetingu bëhet në çdo kohë. Kjo sepse edhe një polic që e kalon vetingun, nesër mund të bëhet pjesë e skemave mafioze dhe mund të largohet më tej. Pretendimi se SHÇBA kompromentohet është absurd. Çdo hyrje në polici do i nënshtrohet vetingut” dhe sot nga foltorja Parlamentit:
“Është harxhuar kohë presidenciale për tu marrë me këtë temë, tani parlamentare, për një temë që nuk ekziston. Ligji nuk ndryshon në substancë, ndryshime të natyrës kozmetike që nuk prekin ligjin e vjetër. Ai parashikonte që ligji të kryehej për të gjithë punonjësit e policisë, dhe një komision të jashtëm, që do të kryente vlerësimin, edhe në ligjin e ri, është ky komision. Në fazën e dytë e të tretë të angazhohen punonjës që janë varësi të SHÇBA, asnjë ndryshim nuk ka ligji i ri me të vjetrin,” tha Ministri I Brendshëm, Sandër Lleshaj, duke e bërë të qartë se kushdo që është në favor të vettingut duhet të jetë në favor të rrëzimit të dekretit.
Ndryshe, Presidenti ka kthyer për rishqyrtimi në Parlament Ligjin nr.20/2019 “PËR DISA NDRYSHIME NË LIGJIN NR. 12/2018, “PËR VLERËSIMIN KALIMTAR DHE PERIODIK TË PUNONJËSVE TË POLICISË SË SHTETIT, GARDËS SË REPUBLIKËS DHE SHËRBIMIT PËR ÇËSHTJET E BRENDSHME DHE ANKESAT NË MINISTRINË E BRENDSHME” pas shqyrtimit nga Presidenca ku konstatohet se ky ligj cenon parimet dhe standardet e vendosura në ligjin ekzistues nr.12/2018, “Për vlerësimin kalimtar dhe periodik të punonjësve të Policisë së Shtetit, Gardës së Republikës dhe Shërbimit për Çështjet e Brendshme dhe Ankesat në Ministrinë e Brendshme”.
Ndryshimet e miratuara me këtë ligj nuk krijojnë garancitë e nevojshme se një proces kaq i rëndësishëm si vlerësimi kalimtar i punonjësve të Policisë së Shtetit dhe të Gardës së Republikës, do të realizohet në kohën e duhur, me objektivitet dhe paanshmëri, duke bërë hapa pas në raport me standartet e ligjit në fuqi. Rishikimi i ligjit ekzistues nr. 12/2018, nëpërmjet ligjit të miratuar nr. 20/2019, bën të mundur që, kompetencat e realizimit të procesit të vlerësimit kalimtar të forcave policore dhe atyre të Gardës së Republikës, t’u hiqen komisioneve të pavarura teknike dhe t’i jepen Shërbimit për Çështjet e Brendshme dhe Ankesat, një organ ky në varësi të drejtëpërdrejtë të Ministrit të Brendshëm,” konstaton Presidenti duke dekretuar kthimin për rishqyrtim në Kuvend të ligjit nr. 20/2019.
