“Vettingu në politikë”, Kryeministri i gallatës: Ti ndajmë me libër shpie të gjitha!

Kryeministri i gallatës, duke folur nga Asambleja u pa qartë se vettingun në politikë e konsideron ashtu si edhe atë në drejtësi, gallatë, ndonëse e pranon se mund ta negocioj me kryetarin e PD, Lulzim Basha, edhe pse ky i fundit e tha prerë se ai nuk negociohet, vetëm mund të votohet.

Por Edi Rama është i vendosur që nesër të ulet me Lul Bashën, dhe fjalroi që përdor tregon se sa seriozisht e ka edhe këtë rradhë:

“Ti ndajmë me libër shpie të gjitha, kush i ka me faqe që mungojnë ta fusë në sqetull e të mos merret me politikë dhe të qepë gojën.”

Me ose pa dashje nuk dihet, por kryeministri harron se në Libër shpie janë vetëm ata që i futen në shtëpi, dhe këtë luks nuk e kishte asnjëri prej atyre që i akuzon PD-ja. Pra, asnjëri nuk i nënshtrohet këtij vettingu.

Nga fjala e Edi Ramës:

“Kanë vrarë, kanë grabitur, nuk u ka hyrë gjemb në këmbë. Përtej kësaj unë them që çdo instrument i ri, i mundshëm, që bën transparencë për mua të parin, gruan time, tokat e gruas sime, pallatin e gruas sime, tenderat e baxhanakut tim, kunatin, fëmijët e mi është një instrument që mund të na vlejë. Në këtë sallë mendojnë që baxhanaku im ka marrë miliona, si sqarohet kjo tani, apo duke e lënë qeverisjen e duke u mbledhur në zyra e duke bërë komunikatat çdo orë për gomarllëqe që nxjerr nga goja PD, apo çizmja e PD që nxjerr nga qafa e këpucës.

Kush e vë dorë në zjarr që baxhanaku im s’ka marrë 15 mln euro, mbase Taulanti, atëherë si bëhet Kush e vë dorën në zjarr që gruaja ime nuk ka ndërtuar pallat, apo që sarajet e mia nuk janë arsyeja që kam aq shumë miqësi më sulltanët.

Shyqyr që u katandis Luli ta bëjë këtë punë, jam gati, çështja është që të mos jetë e lidhur me reformën në drejtësi që të kthejë mbrapsht këtë reformë. Ai vettingu tjetër të vazhdojë, këtë që i lindi në zemër Lulit unë jam gati ta bëjmë dhe ta fillojmë, nuk besoj që një komision bipartizan të merret me këtë, se do ishte një arsye më shumë që njerëzit të ikin nga Shqipëria.

Jam gati që nesër të ulem me Lulin, ai do thotë nuk ulem, unë do ta zgjoj, por nuk ka rendësi kjo, por që ai të bëjë punën. Ti ndajmë me libër shpie të gjitha, kush i ka me faqe që mungojnë ta fusë në sqetull e të mos merret me politikë dhe të qepë gojën”.