Vettingu në politikë, Millard-Basha: Opozita kërkon mbështetje nga SHBA
Shteti është kapur nga krimi i organizuar në Shqipëri. Kështu u shprehë kryetari i Partisë Demokratike, Lulzim Basha, në takim me Krye Zv. Ndihmës Sekretaren e Shtetit, Elisabeth Millard, të cilën e njohu me përkeqësimin e të gjitha standarteve të demokracisë, ku lidhjet e politikës me krimin janë kthyer në shqetesimin kryesor në vend sepse sot kriminelë dhe banda të rrezikshme kontrollojnë qeverisjen dhe përfitojnë shumicën e parave dhe aseteve publike.
Kryetari i Partisë Demokratike e njohu Krye Zv. Ndihmës Sekretaren e Shtetit, Elisabeth Millard, me nismën e opozitës për vettingun e politikës, për pastrimin e Parlamentit, Qeverisë dhe institucioneve të tjera shtetërore nga politikanë të korruptuar dhe të lidhur me krimin. Ky është një proces pastrimi, tha Basha që nuk pengon hetimet e drejtësisë për politikanët dhe zyrtarët e lartë.
“Në një vend ku krimi dikton vendimarrjen, nuk mund të flitet për institucione të pavarura dhe standarde demokratike”.
Kreu i opozitës shprehu vendosmerinë për t’i shkuar deri në fund pastrimit të politikës nga krimi duke kërkuar ndihmën dhe mbështetjen edhe të SHBA në këtë proces jetik per vendin dhe të ardhmen e vendit.
Kryetari i Partisë Demokratike shprehu mirënjohjen e tij për kontributin e jashtëzakonshëm të SHBA për paqen dhe stabilitetin në rajonin e Ballkanit dhe ndau me zyrtaren e lartë amerikane vlerësimin e tij se roli dhe vëmendja e SHBA ndaj zhvillimeve në rajon është e një rëndësie përcaktuese për të ardhmen euro-atlantike dhe europiane të Ballkanit Perëndimor.
