Vettingu në Politikë, PD: Nëse nuk pastrojmë lidhjen e krimit me politikën, nuk ka as zgjedhje, as parlament…

Partia Demokratike ka kërkuar në Këshillin e Legjislacionit ndërmarrjen sa më të shpejtë të procedurave të ndryshimeve kushtetuese me qëllim që të nisë vettingu në politike sepse trajtim special për politikanët nuk mund të ketë më. Duke folur në emër të PD, deputeti Oerd Bylykbashi tha se lidhja krim-politikë, interesa kriminale-interesa politike, janë rreziku kryesor për demokracinë dhe stabilitetin e Shqipërisë.

Kjo lidhje ekziston në forma dhe kanale të ndryshme, tha Bylykbashi, që nga mbështetja politike për krimin, tek aksesi në institucionet shtetërore, tek favorizimi i bizneseve apo personave me lidhje kriminale në ekonomi.

“Një pjesë e madhe e kësaj mbështetje zhvillohet në kufijtë e ligjit: politikanët janë bërë të zgjuar dhe dinë si të japin mbështetje pa shkelur ligjin dhe pa lënë gjurmë. Ky është qëllimi kryesor i vetingut në politikë: të krijojë një filtër shtesë për pengimin e depërtimit të ndikimit dhe interesave kriminale në politikë”, tha deputeti demokrat, kjo është dhe arsyeja pse duhet bërë sa më shpejtë vettingu në politikë:

“Vetingu i politikanëve duhet bërë shpejt. Nëse ne nuk pastrojmë këtë lidhje të krimit me politikën nuk do të ketë as zgjedhje, as demokraci, nuk  mund të ketë as parlament dhe as ekonomi” u shpreh deputeti i Partisë Demokratike, Oerd Bylykbashi në mbledhjen e Këshillit të Legjislacionit ndërsa akuzoi mazhorancën se me procesin në këtë komision ka për qëllim të vonojë, shtyjë dhe hedhë poshtë vettingun e politikanëve. Madje ai kërkoi edhe një kopje të dokumentit që mazhoranca ka dërguar në Komisionin e Venecias për këtë çështje, pasi siç tha ai eksperiencat e mëhershme nuk kanë qenë pozitive.

“Duke nisur dhe nga eksperiencat e mëhershme ku komisioni i Venecias është kedrejtuar qëllimshëm nëpërmjet materialeve të përkthyera gabim apo pyetje të cilat mund të mos i përgjigjen fare çështjes. Kërkoj të na vihet në dispozicion materiali i nisur Komisionit të Venecias. Lidhja krim-politikë dhe lidhja e interesave kriminela me interesat politike. Për fat të keq tashmë kjo lidhje funksionon në kanale të shumëfishta, të ndryshme. Katër forma do të identifikoja unë të politikanëve të lidhur me krimin në një formë apo një tjetër.

Një për të cilën ja kemi gjetur një instrument që është ligji i dekriminalizimit, është politikani me një CV kriminale të drejtëpërdrejtë, me dënim kriminal.  Forma tjetër është politikani që përfaqëson një familje kriminale drejtëpërdrejtë me lidhje gjaku. Nuk kemi më kriminelin por të afërmin, fëmijët, kushërinjtë e kriminelit apo dhe përfaqësuesin, thjesht ushtarin e kriminelit. Kategoria e tretë është politikani në tentativë për të marrë një vendim dënimi penal nga gjykatat shqiptare dhe ditët e fundit e kemi fare dukshëm këtë situatë.

Forma e katërt dhe më e rrezikshme që na bën palë kundërshtare në këtë debat është politikani që ka vendosur ti hapë portën e institucionit, parlamentit të parit dhe më pas institucioneve të tjera, krimit. Ja hap përmes interesash kriminale që penetrojnë në finanancat publike, interesat publike, në jetën shoqërore, në pushtetin publik.

Ndërkohë përfaqësuesi i Partisë Socialiste, deputeti Ulsi Manja vetëm sa përsëriti fjalët e shefit të tij, Edi Rama:

“Në rrafshin politik qëndrimi ynë ka qenë dhe do të jetë në cdo lloj vetingu të politikës. Jemi për pastrimin e politikës. Madje kjo nismë është e cunguar pasi  lë jashtë vetingut persona të afërm familjarë të politikanëve. Në rrafshin kushtetues dhe ligjor qëndrimi ynë ka qenë i qartë. Kërkojmë as më shumë dhe as më pak respektimin e Kushtetutës dhe të rregullores së Kuvendit.”