Vettingu, PD sulmon KPK për Dvoranin/ E mori në mbrojtje për 99 milionëshin e pajustifikuar

Partia Demokratike akuzoi sot Komisionin e Pavarur të Kualifikimit, pak orë pasi në këtë institucion u zhvillua seanca gjyqësore për anëtarin e Gjykatës së Lartë, Ardian Dvorani.

Deputeti Gent Strazimiri tha në një konferencë për shtyp se në seancë u provua që Dvorani nuk justifikonte 99 milionë lekë, por u mor në mbrojtje nga KPK-ja.

“Dvorani që njihet si çanta e shpinës së Xhafës u mor në mbrojtje nga KPK-ja, pavarësisht se ai nuk justifikonte 99 milionë lekë.

Në një rast të paprecedentë KPK-ja përmbysi raportin e ILDKP-së me argumentin se harroi të plotësonte një fletë. Vettingu duhet ta shkarkonte që sot Dvoranin. Mandati i tij ka mbaruar që para 4 vjetësh.

Pse gjithë kjo sakrificë për Dvoranin? Është prokuror i Partisë së Punës.

Ai është ideatori i çdo vendimi të marrë ndaj opozitës gjatë qeverisjes së majtë. Dvorani do e kalojë vettingun, megjithëse nuk justifikon pasurinë”, tha Strazimiri.