“Vettingu që duam”/ KPK, Kryeprokurori i Shkodrës i paaftë deri në vitin 2020!
Reforma në Drejtësi ka kohë që ka dështuar por vettingu që do Edi Rama përveç vendimeve me dy standarde të Komisionit të Pavarur të Kualifikimit nuk kishte marrë vendime të tjera antiligjore. Meqë qytetarët nuk kanë parë gjë akoma, sot KPK mori vendim për Drejtuesin e Prokurorisë së Apelit të Shkodrës, Elvin Gokaj, i cili pasi rezultoi korrekt për dy kriteret, atë të pasurisë dhe pastërtisë së figurës, të shpallet i paaftë për mungesë të theksuar profesionalizmi por jo edhe të shkarkohet.
Po cili do të jetë fati i Prokurorit Elvin Gjokaj i cili sipas KPK në dy rase s’ka analizë të veprës penale; në 1 rast në cilësinë e drejtuesit s’ka dhënë argumentim për zëvendësimin e prokurorit të një çështjeje dhe në një rast ka shkelur të drejtat e të pandehurit duke zëvendësuar avokatin e zgjedhur prej tij me një avokat kryesisht.
Dhe jo vetëm kaq! Përveç dosjeve të analizuara, relatorja Genta Tafa Bungo shtoi se në KPK ishte depozituar një denoncim ndaj prokurorit Gokaj, i cili pretendonte se gjatë periudhës kur subjekti drejtonte prokurorinë e Elbasanit “ka ndikuar te prokurorët për caktimin e masave të buta të sigurisë për të dhënë dënime të ulëta”.
Trupa gjykuese e kryesuar nga Xhensila Pine, me relatore Genta Tafa Bungon dhe anëtare Pamela Qirkon, me shumicë votash mori vendim që ta pezulloj për 1 vit prokurorin Elvin Gokaj për të plotësuar kështu kriterin e profesionalizmit duke ndjekur sërish Shkollën e Magjistraturës.
Pra, vettingu që do Edi Rama nuk mund të toleroj një gjyqtar dhe prokuror të jetë pjesë e sistemit të drejtësisë shqiptare i cili nuk e di se si i teprojnë në xhepat e tij 10.000 lekë, ka marr ryshfet ose është kapur në makinë me nipin e tij që ka 3 gr. marijuanë në xhep, ama nëse një prokuror është i paaftë dhe ka ushtruar profesionin nga viti 2000, dhe në vitet 2007-2013 ishte drejtues i Prokurorisë së Elbasanit ndërsa nga viti 2016 drejtues i Prokurorisë së Apelit të Shkodrës dhe nuk di të bëjë një analizë të veprës penale ose shkel të drejtat e pandehurit, kjo nuk i prish punë Kryeministrit Edi Rama, dhe pas një viti të edukimit të detyrueshëm, ai pa një të keqe do të jetë pjesë e sistemit të rilindur të drejtësisë.
