VIDEO/ Alibeaj: Rama shet çdo gjë për karrigen

Opozita ka vijuar edhe sot protestën e saj në komisionet parlamentare.

Drejtpërdrejt nga Komisioni i Ligjeve, deputeti i Partisë Demokratike, Enkelejd Alibeaj tha se Rama shet çdo gjë për karrigen e vet.

Sipas tij, Rama po bën një pazar të pistë me Shqipërinë, pasi  ka vendosur të kthejë Shqipërinë në një vend refugjatësh.

“Angazhimi ynë i opozitës është bërë i qartë shumë kohë më parë. Kjo opozitë është e vendosur qartazi dhe në mënyrë konsistente dhënies së kontributit për çeljen e negociatave si një lloj vlerësimi që duhet ta miratoj historia politike këtij vendi. Fatkeqësisht ne jemi shumë të qartë në pozicionin tonë politik, ky vend e meriton çeljen e negociatave jo thjesht se ka arritje, por për arsye tjetër, si e si që një dorë tjetër e fortë e sinqertë institucionale t’ia mbyllë një orë e më parë arbitraritetin e këtij kryeministri. Mundësisht delegjitimimin e tij, largimin një orë e më parë”, tha deputeti Alibeaj.

Mjeti kryesor që duhet të na udhëheqë tha Alibeaj është inspirimi europian i opozitës. Ai dha alarmin dhe për Gjykatën Kushtetuese.

“Ne besojmë që inspirimi europian i opozitës dhe gjithë shqiptarëve do të duhet të jetë mjeti i vetëm kryesor që do të duhet të na udhëheqë. Nuk ka nevojë më të madhe tashmë për Shqipërinë e shqiptarët për të shkuarën e sidomos për të ardhmen për të gjetur aleat besnik fanatik që ia duan të mirën këtij vendi për të larguar të keqen më të madhe, kryeministrin, Edi Ramën që në agjendën e vet nuk e ka këtë gjë. Ka vetëm një axhendë, ruajtjen e karriges së vet me çdo mjet, mënyrë e pazar”, tha Alibeaj.