Video/ Banda e klandestinëve, policia italiane jep detaje: Ja si arritëm t’i zbulojmë…
Policia italiane dhe ajo shqiptare kanë zbardhur sot detaje të reja nga aksioni i zhvilluar në tri shtete “Astrolabi” dhe që u finalizua me arrestimin e 25 personave, mes të cilëve 18 shqiptarë.
Në konferencën e përbashkët, autoritetet italiane duke zbardhë detaje nga aksioni thekson se banda e trafikut të klandestinëve drejtohej nga dy vëllezër, të cilët përdornin identitete të rreme.
“Hetimi zgjati mbi 1 vit e gjysmë. Njëri aksion ishte në Bari, ku u kryen 5 arreste. Tjetri në Torino, që përbëhej nga dy vëllezër, të cilët përdornin emra të fantazuar dhe nuk përputheshin me emrat realë. Duke qenë me emra fallso, ato ishin të kërkuar nga shumë forca policore. Hetimet e zhvilluara me teknika të përparuara na bënë të mundur të identifikonim emrat e tyre. Përmes dhe hetimeve të bëra nga GDF arritëm të kuptojmë dhe pagesat që bëheshin, që varionin nga 5 mijë deri në 10 mijë euro,” tha përfaqësuesi i policisë italiane duke zbuluar skemën se si trafikoheshin emigrantët kundrejt parave nga organizata kriminale, e cila kishte celulë në Turqi, Shqipëri e Itali.
“Celula e parë vepronte në Turqi dhe përdorte mjetet e ndërrimit për transportin e emigrantëve. Për të vazhduar aktivitetin e tyre, kishin aktivitet me një grup kriminal në Shqipëri dhe me dy grupe në Itali. Dy grupet kriminale që vepronin në Itali i prisnin emigrantët dhe i ndihmonin të iknin drejt vendeve të tjera. Celula që vepronte në Itali kishte për detyrë të mbështeste personat që mbërrinin, qoftë nga toka, qoftë nga deti, për t’i çuar drejt vendeve të tjera. Këtë grup kemi arritur ta godasim me policinë e Atikës dhe Byronë Kombëtare të Hetimit,” sqaroi ai.
Ndërkohë Policia e Shtetit duke sjellë pamje nga operacioni ndërkombëtar i koduar “Astrolabi” i cili u zhvillua në të njëjtën kohë, në Shqipëri, Itali dhe Greqi, sqaron se ai është shtrirë në Tiranë, Durrës, Fier dhe Vlorë ku janë ekzekutuar vendimet e Gjykatës së Posaçme të Shkallës së Parë Kundër Korrupsionit dhe Krimit të Organizuar, për 18 shtetas shqiptarë dhe të huaj.
Gjatë hetimeve të kryera nga Skuadra e Përbashkët Hetimore, JIT, thekson Policia e Shtetit është dokumentuar veprimtaria e katër grupeve kriminale që ushtronin aktivitetin kriminal të kontrabandimit të personave të ndryshëm nga Lindja e Mesme, me destinacion Italinë e Jugut dhe vendet e tjera të BE-së.
Në dosjen e SPAK thuhet se nga hetimi i përbashkët i kryer janë dokumentuar 30 episode kontrabandimi të 1.120 emigrantëve.
“Gjatë hetimeve të kryera nga Skuadra e Përbashkët Hetimore (JIT) është dokumentuar fakti se pjesëtarët e 4 (katër) grupeve kriminale ushtronin në bashkëpunim ndërmjet tyre aktivitetin kriminal (2 grupe në Itali, 1 grup në Shqipëri dhe 1 grup në Turqi) të kontrabandimit të personave të ndryshëm nga Lindja e Mesme, me destinacion Italinë e Jugut dhe në vijim vende të tjera të BE-së.
Pjesëtarët e këtyre grupeve kriminale pasi siguronin persona të ndryshëm kryesisht në Irak, Siri, Egjipt e vende të tjera kundrejt një shpërblimi monetar nga 5 000 deri në 10 000 Euro, i kontrabandonin ato në rrugë tokësore dhe detare, duke ju mundësuar kalimin në mënyrë të paligjshme nga njëri shtet në tjetrin me destinacion përfundimtar vendet e BE-së. Nga hetimi i përbashkët i kryer janë dokumentuar 30 episode kontrabandimi të 1 120 emigrantëve,” thuhet në njoftimin e SPAK.
