VIDEO/ Basha: Largimi i kësaj qeverie detyrë mbi detyrat, duam një politikë…

Kryetari i Partisë Demokratike, Lulzim Basha, duke iu drejtuar mijëra mbështetësve të opozitës që po protestojnë në shesh, tha se largimi i kësaj qeverie është detyrë mbi detyrat.

Basha theksoi se në këto vite është përsëritur e keqja në një cikël që përsëritet dhe nuk mbaron. “Sot nuk kërkojmë jo thjesht rrëzimin e qeverisë, por një politikë të ndarë nga krimi dhe kriminelët”, tha Basha. Sipas tij pushtetin e bën të mirë vetëm frika nga populli, ndaj na duhet një qeveri që punon për popullin dhe njerëzit. “Të përparuara janë vendet ku qeveritë kanë frikë nga populli, ndërsa të mjera janë vendet ku populli ka frikë nga qeveria”, theksoi Basha.

Pjesë nga fjala e Bashës

Sot jemi mbledhur për të gjetur dritën, dritën që vjen nga Perëndimi, edhe pse ajo shkëlqen nga lart.
Jemi mbledhur me qindra mijëra në këtë shesh për të treguar se jemi europianë, dhe si europianë besojmë tek shteti i së drejtës, demokracia dhe liria.

Sot protestojmë me dinjitetin e njerëzve të lirë. Jemi këtu për ti treguar Perëndimit se qeveria byzantine nuk përfaqëson aspiratën europiane, kemi qeverinë më anti-europiane që ka sot Europa.

Përpjekja jonë nuk është luftë për pushtet, por është luftë kundër sundimtarit shkatërrues, është beteja mes njerëzve që duan drejtësi dhe atyre që kanë kapur drejtësinë, është beteja mes njerëzve që duan siguri dhe atyre që janë në aleancë me krimin.

Atë që nuk bëri komunizmi e bëri Rilindja.

Rilindja nuk degradoi rrugës, ishte që në ngjizje një grupim kriminal. Që në ditën e parë Rilindja e vandalizoi Demokracinë, ngriti një sistem ku pushteti buron nga pazari, nga forca e dhunës, nga paraja, mashtriimi dhe gënjeshtra qeveritare. Kemi pushtetin e një pakice të zhytur dhe që zhytet përditë në krim, për të mbajtur këtë pushtet kriminal dhe të korruptuar.