Video/ Besimtarët myslimanë festojnë Kurban Bajramin!
Besimtarët myslimanë sot festojnë Kurban Bajramin
Ceremonia e faljes u zhvillua në sheshin “Skënderbej”, Tiranë, ku mijëra besimtarë myslimanë falën namazin e Kurban Bajramit dhe qindra mijëra të tjerë kanë festuar dhe kryer faljen në sheshet e çdo qyteti të vendit.
Festimet e kësaj dite filluan që në orët e para të mëngjesit me faljen e përbashkët të namazit të sabahut.
Para faljes së namazit të Kurban Bajramit, besimtarët ndoqën një program të shkurtër, program i cili filloi me këndimin e një pjese të Kur’anit Famëlartë nga Hafizi Enes Hyka.
Ceremonia vazhdoi më tej me fjalën përshëndetëse të Kryetarit të Komunitetit Mysliman të Shqipërisë, H. Bujar Spahiu, i cili uroi besimtarët myslimanë dhe gjithë shqiptarët kudo që ndodhen për festën e Kurban Bajramit.
“Kurban Bajrami na kujton përgjegjësitë për të qenë të kujdesshëm ndaj të drejtës së gjithsecilit. Profeti na mëson se Allahu ka të drejta mbi ne, po ashtu edhe familja, shoqëria, të afërmit. Të falurit dhe të falënderuarit është e drejta e Zotit, ndarja e kohës për familjen është e drejta e saj, haku ndaj punës është e drejta ndaj punëdhënësit dhe kolegëve. Le të shërbejë kjo festë për të kontrolluar ndjenjat tona jo të mira, si urrejtja, smira, thashethemi dhe të ripërtërijmë ndjenjat e bukura të dashurisë, respektit, vëllazërisë, faljes dhe përkujdesjes. Kurban Bajrami është dita kur ne shërojmë plagët që i kemi shkaktuar njëri-tjetrit me buzëqeshje, gëzim e paqe. T’i shohim të gjithë njerëzit me syrin e dashurisë, ashtu siç na sheh ne Zoti dhe le të bëhemi pjesë e gëzimit të tyre duke ndarë së bashku mirësitë e Kurban Bajramit”, – u shpreh z. Spahiu.
Falja e Namazit të Kurban Bajramit u drejtua nga kryetari i Komunitetit Mysliman H. Bujar Spahiu, i cili më pas mbajti edhe hytben për besimtarët e pranishëm.
“Kurbani mbjell në shoqëri shpirtin vëllazëror, bashkëpunimin, ndihmesën dhe shpirtin e sakrificës, ndihmon në zhvillimin e barazisë në shoqëri dhe ndikon në kalimin e hendekut midis shtresave të ndryshme shoqërore, duke i nxitur ata drejt bashkëpunimit. Therja e kurbanit dhe ndihma për nevojtarët duke i gëzuar ata, i shërben zgjerimit të drejtësisë shoqërore dhe fuqizimit të dashurisë midis njerëzve. Gjithashtu nga ana tjetër kurbani e mëson njeriun e pasur të japë nga pasuria e tij për të fituar kënaqësinë e Zotit”- tha ndër të tjera kreu i KMSH-së.
Në fund, besimtarët shkëmbyen mes tyre urimet më të përzemërta për këtë festë të dashurisë dhe sakrificës. Mes urimesh dhe lutjesh besimtarët u larguan nga sheshi për të kryer obligimin e prerjes së kurbanit si dhe për të kryer vizita tek të afërmit e tyre.
Kurban Bajrami në Kosovë
Manifestimi qendror në Kosovë u mbajtë në Xhaminë e Madhe në Prishtinë.
Manifestimi filloi në ora 04:55, me faljen e namazit të sabahut, pas të cilit u mbajt ligjërata tematike kushtuar kësaj feste nga ligjëruesi në Fakultetin e Studimeve Islame në Prishtinë, Dr. Sadat Islami.
Namazi i Kurban Bajramit u fal në orën 06:15, kryesuar nga Drejtori i Medresesë “Alaudin” në Prishtinë, Jakup Çunaku.
Ndërsa mesazhin e kësaj feste, hytben, e mbajti zëvendëskryetari i kryesisë së Bashkësisë Islame të Kosovës, Reshat ef. Mexhidi.
Në fjalën e tij, Mexhidi tha se porosia e Kurban Bajramit qëndron fuqishëm mbi parimet e bujarisë dhe sakrificës. Sipas tij, Zoti nuk e do besimtarin pasur që është koprrac.
Ai ftoi që pasuria të shpërndahet me ata që kanë nevojë, pasi sipas tij, solidariteti dhe ndihma është urdhër kurnaor dhe amanet i profetit Muhamed.
“Të gjithë ne duhet ta dimë se duke i dhënë të varfërve nuk pakëson pasurinë por Zoti do t’jua shtojë pasurinë”, tha ai.
Mexhidi bëri thirrje që njerëzit të jenë më solidarë e humanë, të toelrojnë dhë luftojnë urrejtjet dhe xhelozitë.
Po ashtu, një porosi e rëndësishme që u përcoll ishte edhe ajo për respektimin e femrës. Mexhidi tha se Allahu urdhëron që të gjithë duhet të sillen mirë me femrat dhe të drejtat e tyre të mos nëpërkëmben.
Kurban Bajrami në Maqedoninë e Veriut
Manifestimi qendror i faljes së namazit të Kurban Bajramit në Maqedoninë e Veriut u mbajt në xhaminë “Mustafa Pasha” në Shkup. Para faljes së namazit, Bashkësia Fetare Islame, BFI, tradicionalisht kishte përgatitur program me këndim të Kur’anit dhe të ilahive në gjuhën shqipe, maqedonase, turke, boshnjake dhe arabe.
Namazin e Bajramit e udhëhoqi dekani i Fakultetit të Shkencave Islame në Shkup, Shaban Sulejmani, ndërsa Hytben e Bajramit, në emër të kreut të BFI-së, e lexoi hafizi Aydin Yahya, edhe atë në gjuhën shqipe, maqedonase dhe turke.
H.Aydin Yahya në mesazhin e tij kishte porosi të paqes dhe tolerancës, ndërsa u ndal edhe te haxhinjtë që ndodhen në Vendet e Shenjta. Ai uroi që haxhinjtë nga Maqedonia e Veriut të kthehet shëndoshë dhe me haxh të pranuar.
Duanë e namazit e bëri myftiu i Gostivarit, Shqair Fetahu, dhe më pas besimtarët myslimanë filluan t’ia urojnë njëri-tjetrit festën e Kurban Bajramit.
