Video/ Bilanc lufte nga sfida në Indonezi, Infantino: Dita më e errët e futbollit!

I shokuar nga epilogu tragjik i sfidës Arema FC-Persebaya në Indonezi, ku pas përplasjes së tifozëve ngelën të vrarë 174 persona, është shfaqur edhe Presidenti i FIFA-s, Gianni Infantino, duke e cilësuar si ditë të errët për futbollin.

“Bota e futbollit është nën shok duke ndjekur incidentet e ndodhura në Indonezi. Kjo është një ditë e errët për të gjithë ata që janë të përfshirë në futboll, një tragjedi e pakrahasueshme. I shpreh ngushëllimet e mia familjarëve dhe miqve të atyre që humbën jetën në këtë incident tragjik,” thekson ndër të tjera në reagimin e tij, Presidenti i FIFA-s.

Ndryshe, mbrëmjen e së shtunës në stadiumin Kanjuruhan në Indonezi, fundi i sfidës Arema FC-Persebaya u kthye në një arenë lufte, ku tifozët e dy palëve nisën përplasjen ndërsa ndërhyrja e forcave të policisë jo vetëm që nuk e qetësoi situatën por e përkeqësojë. Tifozët nisën të përplasen edhe më forcat e rendit të cilët përdorën gaz lotsjellës dhe mjeta të forta për të larguar tifozët.

Përfundimi i kësaj ngjarje të rëndë kishte bilanc lufte, 174 tifozë ndërruan jetë ndërsa qindra të tjerë janë të plagosur rëndë dhe në gjendje kritike për jetën.