Video e Policisë, PD: Mashtrim për të fshehur një tentim vrasje të deputetëve të opozitës!
Pasi Policia e Shtetit të Edi Ramës përgënjeshtroi aktin kriminal të forcave speciale ndaj deputetit Luan Baçi, përmes mediave që ka në shërbim ashtu siç i kishte më 21 Janar 2011, ka reaguar Partia Demokratike duke e cilësuar videon e publikuar nga Policia si mashtrim ndërsa sjell pamjet krahasimore të këtij mashtrimi dhe ngjarjes reale ku shihet qartë se si Polici nxjerr pistoletën në drejtim të deputetëve të opozitës.
“Policia e Shtetit ka shpërndarë një video ku tenton të mbulojë aktin e rëndë të policit i cili i drejtoi armën dy deputetëve të opozitës, Luan Baçi dhe Bledion Nallbati. Në një video e cila i është shpërndarë medias nga vetë Policia, tregohet qartë se bombola e gazit është në pozicionin e brinjës ndërsa pistoleta poshtë saj.
Kjo hedh poshtë mashtrimin e policisë për të fshehur një tentim vrasje të deputetëve të opozitës,” shprehet Partia Demokratike në Reagimin e saj shoqëruar me një video.
Flamur Noka: Regjimi arriti kulmin duke kërcënuar me armë deputetët! Asgjë nuk na ndal ne në rrugën tonë
Pas këtij akti kriminal të forcave speciale të Policisë së Shtetit, ka reaguar Sekretari i Përgjithshëm i PD, Flamur Noka, duke i bërë të qartë Edi Ramës dhe Policisë e cila është në shërbim të tij se asgjë nuk do ti ndal në rrugën e tyre opozitare.
“Siç e patë, sot regjimi arriti kulmin, duke i kërcënuar me tytën e armës deputetët. Nuk kishte ndodhur kurrë që forcat speciale të policisë, të armatosura gjer në dhëmbë, të futen në ambientet e gardës së republikës dhe të kërcënojnë me tytën e armëve deputetët, përfaqësuesit e popullit. Këtu vdes demokracia. Këtu vdes shteti ligjor dhe shteti i së drejtës.
Vetëm diktaturat, vetëm juntat fusin në parlament polici dhe forca të armatosura. Institucionet kushtetuese janë të mbrojtura nga Garda e Republikës dhe është rreptësisht e ndaluar të hyjnë,” thotë Flamur Noka i qartë se kur narkoministri, stërnipi i Enver Hoxhës kërcënon opozitën nga foltorja e parlamentit, narkobanditët me uniformë policie janë gati të bëjnë gjithçka.
“E gjitha kjo që patë sot ju, që nga rrethimi, që nga dhuna ndaj deputeteve brenda ambienteve të parlamentit, që nga prania e gardës dhe policisë, tregon një panik. Narkoregjimi është në panik nga mosbindja civile e opozitës.
Edhe kërcënimet që hidhen nga Elisa Spirogjoka 5 milionë eurosh, apo stërnipi i Enver Hoxhës, nuk mund të trgojnë gjë tjetër veçse panik, panik, panik. Asgjë nuk i shpëton nga vullneti i shqiptarëve,” tha Sekretari i Përgjithshëm i PD duke vlerësuar se shqiptarët kërkojnë qeveri teknike sepse nuk mund të pranojnë të shkojnë në zgjedhje me një narkoregjim që dikton fatin e zgjedhjeve shumë kohë përpara zgjedhjeve.
“Nuk kanë kaluar 24 orë nga dita kur kreu i narkos u tha shqiptarëve se do të çelë kapitujt negociatave dhe i çeli me gardë, me narkopolici, i çeli me tytën e armëve duke kërcënuar deputetët.
A mund të jetë ai imazhi i një shteti që çel negociatat? Jo. Jemi të vendosur në rrugën tonë, në aksionin e mosbindjes civile,” tha tha Sekretari i Përgjithshëm i PD, Flamur Noka, duke përfunduar:
“Asgjë nuk na ndal, as Elisa Spirogjoka, as stërnipi i Enver Hoxhës, as kreu i narkos, askush.
Ne do vazhdojmë në rrugëtimin tonë!”
Ndërkohë Grupi Parlamentar i PD ka bërë kallëzim penal në SPAK për Kryetaren e Parlamentit, Elisa Spiropali, Ministrin e Brendshëm, Ervin Hoxha, Drejtorin e Përgjithshëm të Policisë, Ilir Proda dhe Drejtorin e Policisë së Tiranës, Tonin Vocajn.
Sipas drejtuesve të PD, disa punonjës të paidentifikuar policie u futën të armatosur në Parlament dhe kërcënuan hapur si dhe dhunuan brenda ambienteve të parlamentit.
