Video/ Edi Rama nuk ka zgjidhje për ata që kanë lindur, ama ata që do të lindin, lum si ata…

Kryeministri Edi Rama, duke prezantuar pjesë nga platforma e buxhetit të vitit 2019, premtoi sot shpërblim për të gjithë fëmijët që do të lindin pas Janarit 2019: 40 mijë lek për fëmijën e parë, 80 mijë lek për fëmijën e dytë dhe 120 mijë lekë për fëmijën e tretë.

Po si do bëhet për ata që kanë lindur dhe po e braktisin këtë vend?! Edi Rama jo vetëm që nuk ka përgjigje por i quan propagandë si statistikat e INSTAT që i ka vetë nën kontroll ashtu edhe ato të EUROSTAT që u publikuan ditë më parë dhe e renditin Shqipërinë si vendin me azilkërkuesit më në numërë në vendet e Bashkimit Evropian.

Duke ju përgjigjur në mënyrën e tij, ndjekësve që po i shkruanin live nga rrjetet sociale, Rama përzgjodhi Almën nga Suedia, e cila i kujtoi largimet masive të shqiptarëve.

“Kjo është çështje e kohës dhe lirisë për të lëvizur, ne nuk jemi bunker i Enverit dhe njerëzit kanë liri, nëse shqiptarët duan azil, ndodh se ne nuk jemi anëtar të BE­së dhe nuk kemi akses për punësim si anëtarët e BE, por sa për ikjet në numër po të them se nga Kroacia, vend anëtar i BE kanë ikur në një vit më shumë se sa nga Shqipëria. Gjithë shifrat e ikjeve janë propaganda, ikën 500 mijë, 1 milionë, 200 milionë, janë propagandë,” ­tha Edi Rama i cili nuk ka zgjidhje për ata që janë të pakënaqur dhe emigrojnë nga Shqipëria, por ka zgjidhje për pritësin e këtyre emigrantëve, Angela Merkel.

“Por vijnë e ikin, ikin e vijnë dhe kjo është koha në të cilën jetojmë. Nuk jemi vend i mbyllur, njerëzve s’ka qeveri dhe fuqi në tokë që t’ua bëjë Shqipërinë Gjermani sot dhe tu japë mundësitë që mund tu japë Gjermania sot. Por është e sigurtë që ka shqiptarë që duan të ikin, por edhe të rrinë. Ne duhet të bëjmë çmos që e nesërmja të jetë më e mirë se e djeshmja,”­ tha Edi Rama.