Video/ Elbasan, Basha: Ja si do ta çlirojmë qeverinë nga krimi. Platforma…

Duke bojkotuar Parlamentin, opozita e bashkuar u zhvendos në Elbasan, në qytetin simbol të bashkëqeverisjes së Ramës me krimin, ku siç tha kreu i opozitës Lulzim Basha, që vitin e kaluar, Qazim Sejdini, Taulant Balla dhe bandat e krimit nga Çelët te Sanxhaktarët me shokë treguan se kush sundon në këtë qytet.

Por, kryetari i PD, Luzim Basha nga Elbasani bëri të ditur se sipas vendimit të marrë në Shkodër, është duke u përpunuar platforma e opozitës me katër objektivat kryesore, e cila do të bëhet publike menjëherë.

“Ndodhemi në qytetin simbol të bashkëqeverisjes së Ramës me krimin, jo pak analistë e quajtën Elbasanin kryeqytet të krimit.

Qazim Sejdini, Taulant Balla dhe bandat e krimit nga Çelët te Sanxhaktarët me shokë që vitin e kaluar treguan se kush sundon në këtë qytet, në këtë vend, kur goditën policinë e shtetit pa asnjë pasojë ligjore.

Disa orë pas mesazheve tona nga Shkodra ditën e hënë kanë zbarkuar atje forcat policore si i instruktuan qeveritarët e falimentuar të dorëzuar para krimit, por rezultati është zero, e gjithë është shfaqje propagandistike.

Kështu ishte në Elbasan, asnjë nga banditët që goditën shefat e policisë nuk është arrestuar, ndjekur penalisht, asnjë nuk është në burg. Sot kjo peshore është zhvendosur në anën e krimit, është krimi që dikton, ja pse vendi po destabilizohet, Rama i dorëzon territorin krimit dhe po destabilizon vendin. Në më pak se 24 orë dy të rinj, 27 dhe 14 vjeç kanë humbur jetën në një nga qytetet më të vogla në Mamurras,” tha Lulzim Basha duke mos harruar të theksoj edhe simbolikën tjetër të Elbasanit, Xibrakën, fabrikën e kokainës e cila është e lidhur dirket me vëllaun e kryeministrit, Olsi Ramën:

“Elbasani ka dhe një simbolikë tjetër, se këtu është edhe gjeneza e bashkëqeverisjes së Ramës me krimin, Xibraka, fabrika e kokainës e çmontuar vetëm pas ndërhyrjes së partnerëve është çengeli që mban të varur Ramën përmes pjesëmarrjes direkte të Olsi Ramës, vëllait të tij, në një ndërmarrje të shtrirë nga Kolumbia për përpunimin e kokainës. Përfshirja e tij u fsheh nga Tahiri dhe mbeten të fshehura për shkak të Fatmir Xhafës dhe shokut të Agron Xhafës, Ard Veliut, ja pse e sabotojnë komisionin hetimor.

Nuk ka qytet më të përshtatshëm për t’u treguar shqiptarëve se pse pa u çliruar nga krimi nuk do të ketë asnjë përparim domethënës dhe kjo ka të bëjë me çdo familje dhe fatin e shqiptarëve,” tha kryetari i Partisë Demokratike, Lulzim Basha.

Platforma  

Me këtë rast Lulzim Basha bëri të ditur se sipas vendimit të marrë në Shkodër, është duke u përpunuar platforma e opozitës me katër objektivat kryesore, e cila do të nisë të bëhet publike menjëherë.

“Vendimi ynë ka qenë dhe është të merremi me njerëzit. Ai është me krimin, ne jemi me njerëzit! Vendimi ynë është ti japim fund një elite politike të lidhur me krimin dhe të çojmë politikanët e lidhur me krimin, në radhë të parë jashtë institucioneve, dhe pastaj para një drejtësie të reformuar dhe jo para një drejtësie të kapur.

Në këtë mënyrë u kthejmë qytetarëve, mundësinë për të vendosur për fatin e tyre, mundësinë e zgjedhjeve të lira e të ndershme duke ju ofruar një platformë dhe një plan pune që çliron ekonominë nga oligarkët, nga monopolet, nga tenderat korruptivë, nga lejet abuzive.

Nga shtypja e të drejtit, e të voglit, të zakonshmit dhe favorizimi I të mëdhenjve që nuk ngopen kurrë nga privilegjet, zhvatja dhe grabitja që bëjnë duke nisur nga paradhoma e Edi Ramës.

1.Dekriminalizimi i plotë përmes vettingut të politikanëve të lidhur me krimin.

2.Çlirimi i drejtësisë nga kapja politike në funksion të bashkëqeverisjes së Edi Ramës me krimin.

3.Zgjedhje të lira të ndershme, demokratike ku qytetarët të jenë ata që vendosin.

4.Një ekonomi e çliruar nga monopolet, nga oligarkët dhe nga korrupsioni qeveritar, në funksion të mirëqenies së qytetarëve.

Këto janë katër objektivat kryesore të platformës tonë, objekt i diskutimit të gjerë në këtë mbledhje, tha kryetari i PD, Lulzim Basha.