Video/ Fëmijët serbë nga Kosova, trajnohen nga Formacioni famëkeq paramilitar rus

Fëmijët serbë nga Serbia, Kosova dhe Bosnje Hercegovina, pjesëmarrës në kampin e rinisë-patriotike në Zllatibor të Serbisë, ndër të tjera janë trajnuar edhe nga formacioni paramilitar rus E.N.O.T. Korp. Aq më shumë, kjo “mini-ushtri” kontroverse, ishte njëra ndër organizatoret e këtij kampi veror që zyrtarisht quhet i shpërbërë.

Që E.N.O.T. Korp është njëra ndër organizatoret e kampit, nuk e fshehë askush, thekson e përditshmja serbe “Blic”, aq më shumë, flamujt e kësaj organizate si dhe ai i Rusisë, ka ditë që janë vendosur në Zllatibor.

Grupi ultranacionalist rus E.N.O.T. Korp, sipas RFE, gjithë këtë projekt e ka përshkruar si “kamp ushtarak patriotik”, dhe thekson se pikërisht këtë vit në kampin e tyre në Rusi, 30 adoleshentë nga Serbia kishin trajnime të ngjashme.

Të rinjtë, shumica prej të cilëve të mitur, mësonin mbijetesën në natyrë, aftësitë luftarake, përdorimin e armës dhe e gjitha kjo nën uniformën ushtarake.

Çfarë është E.N.O.T. Korp?

Valerij Sambarov, njëri prej liderëve të E.N.O.T.  tha për RFE se organizata e tij dëshiron të ndihmoj të rinjtë “që të bëhen njerëz të vërtetë dhe luftëtar, në mënyrë që ta mbrojnë vendin e tyre”.

Kjo kompani private ushtarake, siç raportojnë mediat, është themeluar gjatë konfliktit në Ukrainë në vitin 2015. Mirëpo, interesante është se ajo është kompania e vetme nga të shumtat që ekzistojnë, që është në kujdesin e Kremlinit. Duke pasur parasysh kohën kur është themeluar, është e qartë se anëtarët e saj kanë marrë pjesë në konfliktet në Dombas dhe rajonin e Donjeckit, natyrisht duke luftuar për Rusinë.

Mbështetje terroristëve, por edhe implikim direkt në aktivitetet luftarake është diçka që ndërlidhet me E.N.O.T. Korp, dhe e gjitha zhvillohet si mision humanitar dhe aktivitet qytetar

Është raportuar se ky grup merr pjesë dhe angazhohet rreth shitjes së pajisjeve ushtarake dhe që furnizon militantët me armatim.

Lidhjet me Kremlinin?

Mediat raportojnë se E.N.O.T. Korp është vetëm një nga dorët e zgjatura të Kremlinit, dhe se për interesat e Rusisë lufton aty ku ky vend nuk dëshiron që zyrtarisht të ketë ushtrinë e saj ose të marrë pjesë në konflikte. Aftësimi për këto njësite kryhet nëpër kampe në të cilat, ashtu si edhe në Serbi, marrin pjesë fëmijë të moshave shumë të reja.

Ata në Rusi ekzistojnë që nga viti 2015, fakt që përputhet edhe me themelimin e E.N.O.T. Korp por edhe me thirrjen e Kremlinit për rritjen e numrit “të rinisë patriotike”, përkatësisht fëmijëve që rriten si ushtarë.

30 Serbian teens traveled to Russia to attend the International Military Patriotic Youth Camp, run by an ultranationalist group called E.N.O.T. Corp. The kids learn to find their way in the woods, handle weapons, and prepare for war. pic.twitter.com/ryt4jCoKzz

— RFE/RL (@RFERL) April 6, 2018

Pikërisht pjesëtarët e këtij formacioni paraushtarak ishin instruktorë të të rinjve serbë që kanë marrë pjesë në kampin e rinisë-patritotike në Zllatibor. Njëri prej tyre është veterani i luftës, Aleksej, e tjetri kolegu i tij më i ri, Evgenije (22).

Siç kanë rrëfyer për të përjavshmen serbe NIN, që të dy janë anëtarë të E.N.O.T. për të cilën thonë se nuk merrë ndihma nga shteti por që merret me punë humanitare. Mirëpo, njëri prej tyre megjithatë e pranoi  se ka anëtarë të “shoqatës së tyre të veteranëve” që kanë marrë pjesë në konfliktet në Ukrainë.

Lidhja me neonazistët

Përveç se është organizatë në vete, E.N.O.T. Korp është e lidhur edhe me grupime tjera ekstremiste ruse. Mediat kanë raportuar për lidhjet e tyre me formacionin neonazist “Rusih”, liderët e të cilëve njihen për vrasje makabër, dhe keqtrajtime të shumta. Njëri prej anëtarëve të njohur të këtij grupimi është Aleksej Milhakov, që në rusi njihet si i riu që vret qenë, me çfarë ai mburrej, por ndërkohë filloi të vrasë edhe ukrainas në Ukrainë, dhe vazhdoi të mburrej në rrjetet sociale.

Kështu njëra prej faqeve ukrainase që  merret me të drejtat e njeriut raporton se pikërisht organizata e tij, së bashku me E.N.O.T Korp kishte trajnime të përbashkëta  për luftëtarë, ku përfshiheshin seminare, sërvitje dhe gjuajtje me snajper, përdorimi i revoles dhe pushkës automatike… Dhe këtu flitet për pjesëmarrjen e fëmijëve në këto kampe patriotike, me trajner të grupit famëkeq “Rusih”, që veten e konsiderojnë luftëtarë të suksesshëm nga Dombasi.

 Mbështetja e Rusisë

Përveç mbështetjes nga komuna serbe e Çajetinës me në krye Millan Stamatoviçin, për organizimin e këtij kampi të rinisë-patriotike në Zllatibor, në hapjen solemne ishte, thekson RFE, edhe një përfaqësues i Ambasadës së Rusisë në Serbi, që dëshmon se për Moskën zyrtare ky grupim militant nuk është i panjohur