Video/ Guardia di Finanza, si u kap kamioni me 400 kg kokainë

Policia italiane ka publikuar pamjet e ndjekjes dhe kapjes së 400 kg kokainë një ditë më parë në Lipjan të Kosovës. Video e Guardia di Finanza tregon operacionin për kapjen e sasisë së madhe të kokainës, i cili filloi pas sinjalizimit nga DEA amerikane, që kaloi nëpër territorin italian nga Porti i Durrësit dhe u kap në Lipjan të Kosovës.

Zyrtarë të Guardia di Finanza Comando Provinciale Reggio Calabria, kanë shpjeguar se si është kapur drogadhe se si të paktën 25 persona janë ndalur dhe 7 prej tyre u janë vënë prangat si të dyshuar në përfshirjen e trafikimit të kësaj sasie kokaine.

Ndryshe, pas sinjalizimeve nga DEA amerikane, Guardia di Finanza ka ndjekur konteinerin që në momentin që u fut në territorin italian. Ngarkesa u identifikua nga Fiamme Gialle dhe nga Oficerët e Agjencisë Doganore të Gioia Tauro përmes skanimit me rreze X, të kryer me pajisje të sofistikuara në portin e Gioia Tauro, të një kontejneri në tranzit nga porti i Santos në Brazil dhe që i drejtohej një kompanie me qendër në Lipjan, Kosovë.

Për të identifikuar autorët e trafikut të kokainës, Prokuroria Publike e Reggio Calabria, DDA, urdhëroi ekzekutimin e një dërgese me ndërkombëtare duke mos e kapur drogën. Kështu në bashkëpunim me prokurorinë e Kosovës dhe atë shqiptare, sasia e madhe e kokainës u la që të dërgohej në destinacion, ku më pas u bë e mundur edhe arrestimi i personave të përfshirë në këtë trafik ndërkombëtar.

Kokaina e sekuestruar, nëse do të shitej me pakicë në qendrat europiane të tregtisë së drogës, do të pasuronte krimin e organizuar me mbi 100 milionë euro.