Video/ Itali, arrestohen dy trafikantë shqiptarë në gomonen me 535 kg drogë nga Shqipëria. Ja emrat…

Një sasi prej 535 kilogramë drogë është sekuestruar nga policia italiane në bordin e një anijeje duke çuar në pranga dy trafikantë shqiptarë.

Guarda di Finanza bën me dije se lënda narkotike po përpiqej të arrinte në bregun e Pulias nga Shqipëria në mes të ditës, raporton Ora News.

Dy trafikantët e arrestuar janë G. D 46-vjeç dhe S.V. 38-vjeç, të cilët akuzohen për trafik ndërkombëtar të drogës.

Ata po e transportonin drogën e llojit marijuanë me një gomone 7 metra të gjatë me një motor drejt Brindisit.

Kontrabandistët u përpoqën të shpëtonin, por ata u bllokuan në det pas një ndjekje të shkurtër.

Në bordin e mjetit lundrues u gjetën 26 pako me marijuanë me peshë totale prej 535 kilogram.

Sipas vlerësimeve paraprake, droga mund t’u sillte atyre fitime deri në 5 milionë euro.

Gomonia e kapur është ankoruar në portin e Brindisit për hetimet e mëvonshme.

Operacioni i Guardia di Finanza nga ajri është zhvilluar në bashkëpunim me forcat e FRONTEX.

Që nga fillimi i vitit 2018, në Pulia janë konfiskuar 12 anije dhe rreth 13 ton marijuanë me 31 kontrabandistë të arrestuar nga Guardia di Finanza.