Video/ KFOR e mohon, helikoterët serb kontrollojnë veriun, Beogradi zyrtar…

Dita e gjashtë me veriun e bllokuar nga serbët u gdhi e qetë ndërsa sot Beogradi zyrtar e pranoi se aksioni i Kryeministrit Albin Kurti me reciprocitetin e targave dhe dërgimin e Njësisë Speciale ROSU në veri, ishte në koordinim me bashkësinë ndërkombëtare përkatësisht shtetet e Quintit. Ndërkohë për mohimin e KFOR-it se helikopterët e ushtrisë serbe kanë hyrë në hapësirën ajrore të Kosovës pasditen e së premtes ata servirën pamje filmike ku shihet qartë se fluturuan edhe mbi kokën e policëve kosovarë ndonëse gazetari i televizionit serb e pranon se u larguan pasi njëri nga pjesëtarët e Policisë së Kosovës hypi mbi mjetin e blinduar dhe i mori në shënjestër me mitraloz!

Sot, Kryetari i Komisionit parlamentar për Kosovë pranë Parlamentit të Serbisë, Milovan Drecun, përkundër propagandës së Vuçiçit, për televizionin publik serb e prani se situata është e qetë ndërsa raportet e mediave se liderët e Listës Srpska po bëjnë përcaktimin e pikave se ku do të vendosen pjesëtarët e Njësisë Speciale të Policisë së Kosovës janë të rreme.

“Eshtë arritur një marrëveshje në mënyrë që të shmanget dhuna dhe incidentet, pasi bashkësia ndërkombëtare do ta akuzonte palën serbe,” tha Drecun e për aksionin e Policisë së Kosovës ai tha se bashkësia ndërkombëtare ishte informuar:

“Disa ditë para marrjes së vendimit, Albin Kurti ka kontaktuar përfaqësuesit e shteteve më të fuqishme perëndimore, për aksionin që do të zhvillohet. Ata nuk e kanë kundërshtuar këtë aksion, duke përfshirë dhe shtetet e Quintit,” tha Milovan Drecun sot në Programin e mëngjesit të televizionit publik serb, RTS, duke shtuar se për këtë aksion ishte informuar edhe KFOR-i.

“Kjo mund të shihet kur në Leposaviç erdhën edhe 50 ushtarë britanikë që filluan të vëzhgojnë situatën në veri të Kosovës. Edhe EULEX-i një ditë paraaksionit arriti nivelin e sigurisë sepse e dinte se çfarë do të ndodhte. Kurti siç duket e kishte marrë dritën jeshile nga disa anëtare të bashkësisë ndërkombëtare që të nisen në këtë aksion,” tha Drecun i cili ndryshe nga shefi i tij Vuçiç e pranoi se delegacioni serb e kishte refuzuar në Bruksel që të bisedohet për zgjidhjen e mundshme të targave të përkohshme ndërsa paralajmëroi krizën e radhës.

“Më 1 tetor sepse skadon afati gjashtëmujor i Prishtinës që të vendos sistemin e pagesave të energjisë elektrike për serbët, që mund të shërbej si shkak për një aksion tjetër të njëanshëm.”

Ndërkohë pas reagimit të KFOR-it se nuk ka informacion që fluturimet serbe e kanë kaluar vijën kufitare administrative, televizioni publik serb, RTS, ka publikuar një video ku shihet qartë se tre helikopterë serb fluturuan edhe mbi kokën e policëve shqiptarë dhe u larguan pasi ata reaguan.

“Nuk kemi informacione që fluturimet serbe e kanë kaluar vijën kufitare administrative. KFOR mbetet i fokusuar në përmbushjen e mandatit të vetë për çdo ditë – i cili buron nga Rezoluta 1244 e Këshillit të Sigurimit të Kombeve të Bashkuara e vitit 1999m për të siguruar një mjedis të sigurt dhe lëvizjen e lirë për të gjitha komunitetet në Kosovë,” sqaron KFOR situatë e krijuar dje ndërkohë RTS raporton me zë dhe figurë:

Duke pranuar se prezenca e tyre shkaktoi habi edhe ndër protestues, helikopterët serb u larguan në drejtimt ë Serbisë vetëm atëherë kur një pjesëtar i Njësisë speciale të Kosovës u fut në mjetin e blinduar duke drejtuar mitralozin nga helikopterët.

Pas largimit të tre helikopterëve serb mbi qiellin kosovar u panë dy “Aligator” rus por siç duket as këta dy helikopter luftarak KFOR-i nuk i konsideroi “armiqësor”.

Ndryshe, në ditën e gjashtë të bllokadës së rrugëve mediat serbe raportojnë se në Jarinje dhe Bërnjak ishte qetë, nuk ka makina dhe nëse ka kryesisht janë turistë të huaj ndërkohë aty është vetëm një kamion derisa ditëve tjera ishin me dhejtëra.