Video/ Mijëra emigrantë bllokohen në kufi, Paloka: Kryetari i OSBE, Edi Rama, i pashqetësuar në plazh mërmëritë…
Deri sa radhët kilometrike në vendkalimin e Kakavijës sa vijnë dhe shtohen ndërsa situata po degradon drejt një katastrofe higjeno-sanitare, dhe nga ana tjetër Ministri i Brendshëm, Ish-Gjeneral Sandër Lleshaj thekson se Ministria për Europën dhe Punët e Jashtme po bën përpjekje për të kërkuar para autoriteteve greke gjetjen e mundësive për përshpejtimin e procedurave të testimit për reduktimin e kohës së pritjes në kufi. ka reaguar Nënkryetari i Partisë Demokratike, Edi Paloka duke konstatuar se edhe sot kur radha në Kakavijë ka arritur 20 km Ministri i Jashtëm dhe kryetari i OSBE-së, Edi Rama, nuk e bën qejfin qeder!
“Ka tre ditë që të moshuar, fëmijë dhe prindër po sfiliten në kufi! 20 km ka arritur radha në këtë vapë! Por kryeministri Rama, ministri i jashtëm Rama, dhe kryetari i OSBE-së Rama, nuk e bën qejfin qeder!,” thekson Edi Paloka në reagimin e tij përmess rrjetit social Facebook duke shoqëruar dhe me një foto ndërsa përfundon:
“Nga lluksi i shfrenuar në rezidencat e Dhërmiut, i sheh shqiptarët në tv e mërmëritë: “Tope, tope o …”
Ndryshe, radha e automjeteve të qytetarëve që duan të kalojnë nëpërmjet pikës Kufitare të Kakavijës për në Greqi, prej dje deri më sot ka shkuar deri në 20 kilometra. Përveç mbylljes së kufirit gjatë natës, shkak për krijimin e trafikut është bërë dhe vonesa e procedurave të kalimit nga pala greke e cila i bën tamponë për koronavirusin të gjithë personave që kalojnë.
Në këtë situatë, Ministri i Brendshëm, Ish-Gjeneral Sandër Lleshaj u mjaftua të thotë se policia është angazhuar maksimalisht por shkak për radhët janë procedurat e reja të testimit për COVID-19.
