Video/ Morën peng një shqiptar për 10.000 euro në Greqi, arrestohen 5 persona

Ngjarja e rëndë e cila u raportua të shtunën nga mediat greke me marrjen peng të një shqiptari për 10.000 euro nga bashkëkombasit e tij, sot përfundoi me arrestimin e 5 pengmarrësve dhe lirimin e viktimës.

Njoftimin e ka bërë sot Policia e Shtetit duke theksuar se operacioni policor i koduar ”Korinthos”, ka përfunduar me arrestimin e 5 shtetasve të dyshuar si autorë të pengmarrjes së një shtetasi, nga këta 1 i arrestuar në Shqipëri dhe 4 në Greqi.

“Falë inicimit nga Policia e Tiranës, dhënies së informacionit në kohë reale Policisë greke me adresën e saktë të vendndodhjes së pengmarrësve dhe mbajtjes së pengut, Policia greke bëri të mundur lirimin e pengut dhe arrestimin e katër shtetasve.”

Specialistët e Sektorit për Hetimin e Krimeve të Rënda ndaj Jetës dhe Pronës në Drejtorinë Vendore të Policisë Tiranë morën informacion se në një fshat të Korinthos, Greqi, disa shtetas shqiptarë për motive të dobëta kishin marrë peng një shtetas nga Tirana dhe i kërkonin 10.000 euro për ta lënë të lirë.

“Policia e Tiranës, falë informacionit të grumbulluar për vendndodhjen e saktë të autorëve dhe vendit ku mbahej peng shtetasi J.T., i ka dhënë nëpërmjet Interpol Tirana, Policisë greke informacion të saktë në kohë reale mbi vendndodhjen (adresën e banimit) të personit të marrë peng dhe pengmarrësve,” thekson Policia e Shtetit në njoftimin e saj duke shtuar se Policia greke mbi bazën e informacioneve të marra nga Policia shqiptare bëri të mundur arrestimin në flagrancë të shtetasve:

Xh.N., 49 vjeç, banues në Tiranë.

H.M., 35 vjeçe, banuese në Tiranë.

B.M., 41 vjeç, banues në Tiranë.

M.M., 19 vjeç, banues në Tiranë.

Gjithashtu, si rezultat i ndërhyrjes në kohë është bërë i mundur lirimi i pengut, shtetasi J. T., banues në Tiranë.

Po në vijim të operacionit Policia e Tiranës bëri kapjen dhe arrestimin në flagrancë të shtetasit:

L. P., 24 vjeç, banues në Tiranë, (bashkëpunëtor)

Policia e Tiranës në bashkëpunim me Prokurorinë e Krimeve të Rënda Tiranë vazhdon punën intensive për dokumentimin e plotë ligjor të kësaj ngjarje.

Ndërkohë policia greke ka zbardhur detaje të reja lidhur me arrestimin e shtetasve shqiptarë.

Lidhur me arrestimin e katër shqiptarëve në Greqi, policia greke sqaron se arrestimi i tyre është bërë më 23 gusht në darkë, pasi një ditë më parë ata kishin marrë peng 31-vjeçarin J. T., me banim në Tiranë.

Sipas policisë greke, 49-vjeçari Xh. N. kishte marrë te stacioni i autobusëve në Lutraki, Korinthia, shqiptarin 31-vjeçar, duke e mbajtur më pas peng në një banesë në Nemea të Korinthias dhe nën ushtrimin e dhunës i ka kërkuar shumën prej 10.000 euro.

Pas njoftimit nga Interpoli, është organizuar operacioni dhe është liruar pengu ndërsa janë arrestuar autorët.