Video/ Moskë, Edi Rama shpif kundër Lulzim Bashës edhe si Kryesues i OSBE
E quajti “Enciklopedi e gjallë” ministrin e Jashtëm, Sergei Lavrov, por kjo nuk e pengoi kryeministrit Edi Rama që si kryesues i OSBE ta gënjejë për së gjalli kur ai i foli për një Traktat miqësie dhe bashkëpunimi, të cilin Lavrov tha se e kishte firmosur me ministrin e Jashtëm shqiptar në Tiranë në vitin 2004. Edi Rama duke e pranuar ekzistimin e një marrëveshje të tillë tha se e kishte firmosur udhëheqësi i sotëm i opozitës kur dihet se ministër i Jashtëm ishte Kastriot Islami.
“Në 2004 menjëherë sapo u emërova Ministër i Jashtëm i Rusisë bëra një takim në Tiranë dhe më pas nënshkruam një traktat miqësie dhe bashkëpunimi me Ministrin e Jashtëm të asaj kohe. Nuk u ratifikua pasi pala shqiptare e la mënjanë këtë dokument, e harroi. Por ekziston, është gati dhe ne mund ta bëjmë efektiv në mënyrë që ti kemi të qarta parimet e marrëdhënieve tona. Megjithatë jam i sigurt që do të komunikojmë përgjatë këtij viti nëpërmjet telefonit dhe do të diskutojmë çështjet e OSBE, jemi të gatshëm për këtë,” tha Lavrov pa specifikuar emrin e ministrit shqiptar.
Dhe Edi Rama i cili është mësuar që për çdo gjë të fajësojë opzoitën dhe liderin e saj Lulzim Basha, e fajëson edhe për një marrëveshja të vitit 2004 kur Partia Socialiste ishte në pushtet dhe mëkëmbësi i tij, Kastriot Islami ishte shef i diplomacisë:
“Po ka pasur një marrëveshje të nënshkruar mes jush dhe udhëheqësit të sotëm të opozitës sepse ka qenë Ministër i Jashtëm i asaj kohe por më duhet t’i mbetem parimit që diçka që është nënshkruar nga qeveria e mëparshme natyrisht nuk është se nuk duhet pranuar nga qeveria aktuale. Kur të kthehem në vend do ta shoh me kujdes dhe do t’ju dëshmoj që unë them çfarë bëj dhe bëj çfarë them,” tha Edi Rama pa i lëvizur qerpiku ndonëse ishte fjala për Kastriot Islamin, dhe këtu Rama nuk gabon, meqë ishte njeriu i cili përveç Rusisë i shërbeu edhe Serbisë duke e lënë të anëtarësohet në OSBE pa përdorur veton si masë mbrojtëse për Kosovën.
