Video/ Në Paris, Zelenskyy: Putin do të vdesë së shpejti!

Është thelbësore që Shtetet e Bashkuara të mos e ndihmojnë Presidentin e Rusisë, Vladimir Putin, nga izolimi politik dhe ekonomik, tha Presidenti ukrainas Volodymyr Zelenskyy në një intervistë për Eurovision News.

Kjo deklaratë e Zelenskyyt vjen pasi Rusia dhe Ukraina ranë dakord të zbatojnë një armëpushim të pjesshëm të ndërmjetësuar nga Shtetet e ashkuara për sulmet ndaj infrastrukturës energjetike dhe armiqësive në Detin e Zi. Në këmbim, SHBA ranë dakord të zgjerojnë aksesin e Rusisë në tregjet globale.

“Është shumë e rëndësishme që Amerika të mos e ndihmojë Putinin të dalë nga ky izolim global tani. Besoj se është e rrezikshme. Ky është një nga momentet më të rrezikshme”, tha Zelenskyy ndërsa pretendon se Putini shpreson të “mbesë në pushtet deri në vdekjen e tij”; Por, gjithashtu se ambiciet e tij nuk kufizohen vetëm në Ukrainë, por mund të çojnë në “konfrontim të drejtpërdrejtë me Perëndimin”.

“Ne ishim gati për një armëpushim të plotë”

Volodymyr Zelensky u bëri thirrje Shteteve të Bashkuara dhe Evropës që të qëndrojnë të bashkuar në ushtrimin e presionit ndaj Putinit.

“Udhëheqësi rus ka frikë nga aleanca evropiano-amerikane dhe shpreson ta ndajë atë. Putin ka frikë edhe nga vdekshmëria e tij,” beson Zelenskyy.

“Ai do të vdesë së shpejti, ky është një fakt dhe gjithçka do të përfundojë,” shtoi ai, sipas Kyiv Independent. Në një deklaratë të lëshuar pas raundit të fundit të bisedimeve me të dërguarit rusë në Arabinë Saudite, SHBA premtoi të lehtësojë disa kufizime ekonomike ndaj Rusisë si pjesë e një marrëveshjeje për një armëpushim të kufizuar.

Zelenskyy tha se armëpushimi i kufizuar në Detin e Zi ishte padyshim një hap drejt përfundimit të luftës, por theksoi angazhimin e Ukrainës për një ndërprerje të pacaktuar të armiqësive, ndërsa përfundoi:

“Në përgjithësi ishim gati për një armëpushim të plotë!”