Video/ Pezullohen 19 Zyrtarët policor, të arrestuar në Veri
Kryeshefja e Inspektoratit Policor të Kosovës, Miradije Kelmendi, në konferencën për media, ka bërë të ditur se nga 19 zyrtarët policor të arrestuar, 11 janë të nacionalitetit serbë, 4 shqiptarë dhe 4 boshnjakë.
Prej tyre njëri komandant i stacionit policor, tre rreshter dhe të tjerët kanë qenë zyrtarë policorë. Ata janë dërguar në ndalim 48 orësh dhe janë pezulluar nga detyra.
“ Janë bastisur 12 lokacione. Janë arrestuar 19 punonjës policor, prej tyre 11 të nacionalitetit serbë, 4 shqiptarë dhe 4 boshnjakë. Njëri ka qenë kapiten, tre rreshter dhe të tjerët policë. Nga këto bastisje janë konfiskuar armë, pajisje teknologjike dhe një sasi parsh. Zyrtarët janë ndaluar për 48 orë dhe të njëjtit janë suspenduar nga detyra”, tha ajo në konferencën e përbashkët për media me Policinë e Kosovës dhe me Prokurorinë.
Kurse kryeprokurori Sylë Hoxha, ka bërë të ditur se Prokuroria Speciale kishte filluar para një viti procedurat penale ndaj disa personave të dyshuar.
“Gjatë kësaj periudhe prokuroria në bashkëpunim me IPK-në dhe hetuesit e Policisë së Kosovës kanë kryer shumë veprime procedurale dhe kemi marrë urdhëresa nga Gjykata Themelore.
Prokuroria po ashtu ka dëgjuar një numër të madh të dëshmitarëve që kanë kontribuuar në grumbullimin e informatave . Pas këtij aktiviteti 1 vjeçar Prokuroria i ka parashtruar Gjykatës Themelore kërkesë që të bëjë kontrollin e lokale dhe shtëpive të të dyshuarve”, ka thënë Hoxha.
Ai njoftoi se në vazhdën e arrestimeve ka pasur eprorë dhe zyrtarë të policisë së Kosovës, të nacionalitetit shqiptar, serb dhe boshnjak si dhe qytetarë.
Ndërkaq Drejtor i Përgjithshëm i Policisë së Kosovës, Rashit Qalaj ka deklaruar se operacioni i ndërmarrë sot nga PK ka përfunduar me sukses.
Qalaj para mediava ka dhënë disa detaje rreth operacionit policor kundër krimit të organizuar të zhvilluar në veri të Mitrovicës.
“Dje inspektorati policor ka marrë një urdhër-arrest për një numër të konsiderueshëm të zyrtarëve policor dhe një numër të qytetarëve dhe ky urdhër-arrest është bazuar në hetimet që janë ndërmarrë nga Inspektorati policor dhe hetuesi e policisë kufitare të Kosovës. Ne kemi bërë përgatitjet e duhura që ky urdhër-arrest të behët në mënyrë më të mirë të duhur, ka qenë përgatitje e shpejtë, por e menduar në detaje”, ka thënë Qalaj.
Qalaj tha se operacioni policor ka filluar rreth orës 06:00, gjithashtu ai ka treguar për problemet që kanë hasur gjatë bastisjes në Zubin Potok.
“Në Zubin Potok, ka pasur probleme sapo është nisur policia për të bastisur disa lokacione ka hasur në një pritje me gjuajtje me armë, kundër policisë, ku është plagosur një polic, por që ai është mirë, dhe gjendet në Spital. Po ashtu nga plumbi i njëjtë është goditur edhe një polic tjetër, mirëpo i ka shkaktuar disa mavijose të lehta”, shtoi ai.
Drejtori i PK-së tha se sapo e kanë vërejtur rezistencën e armatosur kanë dhënë urdhër për angazhimin e njësive elitë të PK-së.
“Kemi eliminuar barrikadat në rrugë për të depërtuar në Zubin Potok, dhe i kemi kontrolluar shtëpitë që kemi pasur në plan. Kemi pasur edhe tre zyrtarë të lënduar, gjatë përpjekjeve të largimit të barrikadave”, deklaroi ai.
Qalaj në fund të konferencës tha se operacioni është realizuar në përpikëri, pavarësisht rezistencën në Zubin Potok, ai shtoi se në disa lokacione kanë gjetur armë zjarri, telefona, monedha etj.
