Video/ Policia heton incidentet në veri, protestat serbe vazhdojnë

Policia e Kosovës tha se po heton të gjitha rastet që ndodhën dje në veri të Kosovës, gjatë protestës së serbëve në Zveçan, Leposaviç dhe Zubin Potok.

Sipas Policisë së Kosovës, protestues, individë “dhe grupe kriminale, me dhunën ekstreme të shfaqur, kanë bërë që situata në aspektin e sigurisë në veri të vendit të përshkallëzohet dhe të degradojë deri në rrezikim të jetës së njerëzve, përfshirë jetën e zyrtarëve të institucioneve të sigurisë”.

Dje, gjatë përleshjeve të protestuesve me trupat e KFOR-it në Zveçan, 30 trupa ndërkombëtare u lënduan si dhe dhjetëra protestues.

Po ashtu janë shënuar një sërë incidentesh nga ekipeve të mediave, që kanë përcjellë nga afër protestat në veri, përfshirë djegien e një veture të një kanali televiziv.

Ndërkaq, sa i përket situatës së sigurisë në veri, sot policia tha se ajo vazhdon të jetë “e brishtë, por e qetë”.

Serbët edhe sot kanë vazhduar protestat e tyre në tre komunat në veri, duke kundërshtuar kryetarët e rinj shqiptarë dhe duke kërkuar tërheqjen e njësive speciale të Policisë së Kosovës nga këto komuna.

“Policia e Kosovës edhe sot fton qytetarët për qetësi dhe të mos bien pre e thirrjeve për protestë të dhunshme dhe provokime të çfarëdo natyre qofshin ato”, thuhet në njoftim.

Zyrtarët policorë, sipas njoftimit, janë të angazhuar në mbarëvajtjen e protestave dhe aktivitetet po i koordinojnë me trupat e KFOR-it.

Pas përleshjeve në Zveçan, presidenti i Serbisë, Aleksandar Vuçiq, u bëri thirrje serbëve në veri të Kosovës që të mos përplasen me NATO-n.

Qeveria e Kosovës fajësoi Beogradin për dirigjimin e turmës ekstremiste në veri të shtetit.

Por, komandanti i KFOR-it, gjeneralmajor Angelo Michele Ristuccia kërkoi nga Kosova dhe Serbia që të marrin përgjegjësinë e plotë për ngjarjet që ndodhën më 29 maj në veri të Kosovës dhe të mos fshihen pas narrativëve të rremë./RFE/