Video/ “Poroshenko” i premtoi Haradinajt njohjen e Kosovës!
Në kurthin e dy komikët rusë, Vladimir Kuznetsov Vovan dhe Alexei Stoljarov Leksus, ka rënë edhe Kryeministrin i Kosovës, Ramush Haradinaj. Njëri nga ta i është prezantuar Kryeministrit Haradinaj si President i Ukrainës, Petro Poroshenko (aktualisht Ish-President), duke i thënë se pas zgjedhjeve presidenciale në Ukrainë do ta njohë pavarësinë e Republikës së Kosovës në shkëmbim të mbështetjes së Haradinajt.
Komikët rusë e kanë telefonuar dy herë Kryeministrin Ramush Haradinaj, një herë në janar dhe një herë në prill.
Në këtë bisedë telefonike të publikuar në youtube nga ‘Russia 24 tv’, Haradinaj i premton mbështetje ‘Poroshenkos’, duke i thënë se do ta përkrahë publikisht përmes llogarisë së tij në twitter.
“Shpresoj që gjithçka të shkojë mirë për ju, dhe jam i lumtur që mund t’iu uroj sukses për të dielën. Kjo është shumë e rëndësishme për shtetin, do të lutem për ju në të gjitha zgjedhjet,” tha Haradinaj gjatë bisedës me njërin prej komikëve rus, e për të cilin pretendonte se ishte Poroshenko.
Ndërkohë pas fjalëve të Haradinajt, “Proshenko” i ka kthyer përgjigje duke i thënë se pas fitores do ta pranojë Kosovën si një shtet të pavarur.
“Po, dhe mendoj që pas fitores, unë do ta njohë Kosovën si një shtet të pavarur,” i është përgjigjur komiku rus.
Pas kësaj bisede të zhvilluar, Haradinaj i rënë në kurthin e komikëve rus, ka publikuar një status në Twitterin e tij ku i ka uruar fitore në zgjedhje Petro Poroshenkos dhe kryeministrit të tij “Vovan Lexusov”.
“I uroj popullit të Ukrainës zgjedhje të lira dhe demokratike. Për mikun tim Poroshenko dhe kryeministrin e tij të ardhshëm Vovan Lexusov dëshiroj fitore për të udhëhequr Ukrainën drejt rrugës së integrimit Euroatlantik. Populli i Kosovës dhe ai i Ukrainës qëndrojnë së bashku për liri dhe propsoritet,”ka shkruar Haradinaj në llogarinë e tij në Twitter.
Ndryshe, në kurthin e komikëve rus kishte rënë edhe Kryeminsitri i Maqedonisë Veriore, Zoran Zaev, i cili pas publikimit të kësaj bisede ditë më parë tha se ishte ai që u kishte dhënë numrin e Ramush Haradinajt, komikëve rus.
Zaev në bisedë më ta dëgjohet teksa flet me frikë për idenë e ndarjes së Kosovës, duke thënë se Edi Rama, Hashim Thaçi dhe Aleksander Vuçiç kanë një plan për ndarjen e Kosovës me mbështetjen e Rusisë dhe Turqisë.
