Presidenti pranon Letrat Kredenciale të Ambasadores së re të SHBA

Presidenti i Republikës pasi pranoi Letrat Kredenciale të Ambasadores së re të SHBA, Yuri Kim, tha se Shtetet e Bashkuara janë një partner strategjik, i pazëvendësueshëm për Shqipërinë.

“Së bashku të përballojmë me sukses sfidat që ka vendi. Zoti e bekoftë miqësinë shqiptaro-amerikane!” u shpreh Presidenti i Republikës, Ilir Meta pas ardhjes së shumëpritur të Ambasadores së re të SHBA, Yuri Kim, në kulmin e krizës politike dhe përpjekjeve të para për hartimin e Reformës zgjedhore si dhe krizës institucionale të shkaktuar nga zbatimi i Reformës në Drejtësi sipas logjikës së Edi Ramës.

Ndryshe, Ambasadorja e re e SHBA në Shqipëri, Yuri Kim, pasi u emërua nga Presidenti Donald Trump, para Komisionit të Jashtëm të Senatit u zotua se do të nxis udhëheqësit shqiptar për të zgjidhur ngërçin aktual politik në mënyrë që të forcohet perspektiva e hapjes së negociatave të anëtarësimit në BE; Do të inkurajoj gjithashtu Shqipërinë të zbatonte plotësisht reformat në drejtësi, përfshirë kontrollin e figurës së gjyqtarëve dhe prokurorëve dhe krijimin e strukturave të posaçme për luftën kundër korrupsionit dhe krimit të organizuar; Si dhe e sheh si përparësi edhe ndihmën teknike për Shqipërinë në hetimin, ndjekjen dhe ndëshkimin e korrupsionit dhe krimit të organizuar ndërnacional.

Reagimi i plotë:

“I kënaqur të prisja dhe të pranoja Letrat Kredenciale të Ambasadores së re të SHBA, znj.Yuri Kim. SHBA një partner strategjik, i pazëvendësueshëm për Shqipërinë.

Së bashku të përballojmë me sukses sfidat që ka vendi. Zoti e bekoftë miqësinë shqiptaro-amerikane!”