VIDEO/ Rusia 2018, Franca kampione e Botës

Franca është kampion i ri i botës! Francezët shënuan fitoren me rezultatin 4:2 ndaj Kroacisë, në finalen e madhe që u luajt në stadiumin “Luzhniki” në Moskë. Franca triumfoi falë golave të Antoine Griezmann, Paul Pogba, Kylian Mbappe dhe autogolit të Mario Manxhukiç.

Finale drithëruese që do të mbahet mend një periudhë të gjatë, për nga loja e shpejtë, e hapur, me raste shënimi dhe gjithsej gjashtë gola! Spektakël futbolli në Moskë, Franca dhe Kroacia dhanë maksimumin.

Kroacia me gjithë humbjen, tregoi lojë të mirë, por nuk ia doli ndaj një France të jashtëzakonshme në krye me Kylian Mbappen e shkëlqyeshëm. Franca fitoi titullin, i dyti në histori, pasi të parin e ka fituar në vitin 1998 kur mundi 3:0 Brazilin.

Kroatët luftuan me të gjitha forcat që të fitojnë titullin e parë në histori të tyre.

Në minutën e 18-të, sulmuesi Antoine Griezmann nga gjuajtja e lirë harkoi në 16-sh, ndërsa sulmuesi Mario Manxhukiç, duke tentuar ta evitojë rrezikun shënoi autogol, 1:0 për Francën.

Tre minuta më vonë (21’) Vida godet me kokë por për fat të keq të tij shkoi lartë mbi portën e francezëve. Në minutën e 24-të, Manxhukiç nga një pozitë jo aq e volitshme goditi jashtë portës.

Në minutën e 28-të, Ivan Perishiç me një veprim mjeshtëror mashtroi një mbrojtës dhe nga rreth 15 metra dërgoi topin në këndin e majtë të portierit Lloris, 1:1.

Në minutën e 34-të, Ivan Perishiç preku topin me dorë, kurse gjyqtari argjentinas Nestor Pitana shkoi te sistemi Var dhe vendosi penallti, duke akorduar në favor të Francës. Griezmann gjuajti me saktësi, duke kaluar në epërsi (2:1) Francën pikërisht në minutën e 38-të.

Në pjesën e dytë përkatësisht në minutën e 47-të, Griezmann nga rreth 20 metra dërgoi gjuajtje mjaft të fortë por Subashiç nuk befasohet. Menjëherë Kroacia në veprim, Ante Repiç me të parën nga rreth 13 metra goditi fuqishëm, por Lloris hero, me majë të gishtërinjve e dëboi në korne.

Në minutën e 52-të, Kylian Mbappe me shpejtësi të madhe futet në 16-sh, rast i qind për qindtë i sigurtë, por Subashiç fenomenal.

Në minutën e 59-të, reagim i dobët i mbrojtjes së Kroacisë, Paul Pogba nuk fali, nga rreth 17 metra shënoi supergol, duke e lënë të shtangur portierin kroat, Subashiç dhe 3:1.

Pas gjashtë minutave (65’) Kylian Mbappe nga rreth 22-23 metra me goditje të fuqishme fërfëlloi topin në këndin e poshtëm të djathtë të Subashiçit, 4:1.

Portieri Lloris bëri gabim trashanik, duke ia marrë Manxhukiçi topin dhe e futi në rrjetë, 4:2 pikërisht në minutën e 69-të.

Ivan Rakitiç i pafat në minutën e 78-të, goditja e tij jashtë portës së Llorisit.

Franca-Kroacia 4:2

Stadiumi “Luzhniki Arena” në Moskë.

Shikues: 78011.

Gjyqtar: Nestor Pitana (Argjentina).

Shënues: Manxhukiç (18’-autogol), Griezmann (39’-nga penalltia), Pogba (59’), Mbappe (65’) -Perishiç (28’), Manxhukiç (69’).

Kartonat e verdhë: Kante, Lucas- Vrsaljko.

Franca: Lloris, Pavard, Varane, Umtiti, Lucas, Pogba, Kante (N’ Zonzi 55’), Mbappe, Griezmann, Matuidi (Tolisso 73’) dhe Giroud (Fekir 81’).

Kroacia: Subashiç, Vrsaljko, Lovren, Vida, Striniç (Pjaca 92’), Rakitiç, Brozoviç, Rebiç (Kramariç 71’), Modriç, Perishiç dhe Manxhukiç.

Kampionët e botës

1930 Uruguai

1934 Italia

1938 Italia

1950 Uruguai

1954 Gjermania Perëndimore

1958 Brazili

1962 Brazili

1966 Anglia

1970 Brazili

1974 Gjermania Perëndimore

1978 Argjentina

1982 Italia

1986 Argjentina

1990 Gjermania Perëndimore

1994 Brazili

1998 Franca

2002 Brazili

2006 Italia

2010 Spanja

2014 Gjermania

2018 Franca