Video/ Shaip Kamberi në Washington: Çështja e Luginës të jetë pjesë e bisedimeve!

Liderët e Luginës së Preshevës duke u angazhuar për çështjet e të drejtave të shqiptarëve në Serbi, në takim me politikanët amerikanë në Washington kanë kërkuar që çështja e shqiptarëve të Luginës të jetë pjesë e dialogut Kosovë-Serbi.

Gjatë këtyre takimeve në Washington, deputeti shqiptar në Parlamentin e Serbisë, Shaip Kamberi, ka informuar senatorët amerikanë për problematikat me të cilat përballen shqiptarët e Luginës së Preshevës.

 “Kemi kërkuar nga zyrat e senatorëve që çështja e shqiptarëve të Luginës të jetë në agjendën e politikës së jashtme të SHBA-së, e të jetë edhe pjesë e dialogut mes Kosovës dhe Serbisë,” thotë Kamberi përmes një video të publikuar në rrjetin social Facebook.

Pas kësaj vizite, deputeti shqiptar Shaip Kamberi shpreson se çështje e Luginës së Preshevës do të merr një dimension tjetër për të drejtave të shqiptarëve atje.

“Sot patëm një brifing në zyrat e senatorëve Ernst e Peters, në të cilin diskutuam për çështjen e problematikat e shumta me të cilat ballafaqohen shqiptarët e Luginës së Preshevës…Kërkuam nga zyrat e senatorëve të nderuar që çështja e shqiptarëve të Luginës të jetë në agjendën e politikës së jashtme të SHBA-së, e të jetë pjesë e dialogut mes Kosovës dhe Serbisë, që të trajtohen të gjitha çështjet problematike që do të rëndojnë të ardhmen raportet mes dy shteteve,” tha Kamberi.

Ndryshe, delegacioni i Luginës së Preshevës u prit nga senatorët, republikania Joni Ernst nga Iowa dhe demokrati Gary Peters nga Michigan, si bashkëkryesues të Grupit për Çështje Shqiptare në Senat.

Pjesë e këtijë delegacioni i cili po qëndron në Washington me financim të Qeverisë së Kosovës, janë: deputeti Shaip Kamberi, kryetari i KNSH Ragmi Mustafa, ish-kryetarët e Preshevës Ragmi Mustafa e Ardita Sinani, dhe Flora Ferati nga Medvegja.