VIDEO/ Thirrje Presidentit, PD: Mos firmos ligjin e shembjes së Teatrit Kombëtar

Partia Demokratike i ka kërkuar Presidentit të Republikës që të mos dekretojë projektligjin e qeverisë i cili do të çojë në shembjen e godinës së Teatrit Kombëtar.

Deputetja e PD Albana Vokshi  duke firmos peticionin “Teatri Kombëtar, monument kulture”, i bëri thirrje deputetëve të forcave të tjera politike që të kundërshtojnë projektligjin dhe ti bashkohen nismës së artistëve dhe qytetarëve për mbrojtjen e godinës së Teatrit Kombëtar duke e firmosur peticionin.

“Ne do vazhdojmë rezistencën tonë në komisione. Do vazhdojmë t’i kërkojmë qeverisë që ta kthejë mbrapsht këtë projektligj. Nuk duhet lejuar asnjë projektligj që përmban shkatërrimin e Teatrit Kombëtar. I kemi dërguar letra sensibilizimi edhe institucioneve ndërkombëtare për të ndalur shkatërrimin e monumenteve të kulturës”, tha Vokshi

Dy deputetet e PD Albana Vokshi dhe Dhurata Çupi me rastin e firmosjes së peticionit kundër shembjes së Teatrit Kombëtar theksuan se janë 8 mijë metër katror të cilat Edi Rama do t’ja japë kompanisë Fusha për të ngritur 6 kulla, 3 prej të cilave do ngrihen mbi truallin e Teatrit.