Video/ Ukrainë, shkatërrohet një luftanije ruse në Krime, ky është momenti…

Shërbimi sekret i ushtrisë në Ukrainë ka bërë të ditur se ka shkatërruar luftanijen e madhe ruse “Cezar Kunikov” përmes dronëve detar Magura V5, duke saktësuar se sulmi ndodhi në Detin e Zi, në afërsi të qytetit Alupka në krimenë e pushtuar.

“Shërbimi sekret i ushtrisë Ukrainës, në bashkëpunim me të gjithë komponentët e Forcave të Sigurisë dhe të Mbrojtjes së Ukrainës, ka shkatërruar anijen e madhe luftarake Cezar Kunikov, e cila i takon Flotës së Detit Zi të shtetit agresor Rusisë. Misionin e suksesshëm e kanë realizuar forcat speciale të Grupit 13 të Shërbimit sekret të ushtrisë së Ukrainës,” thuhet në komunikatë. 

“Në pjesën e majtë u krijuan gropa të mëdha dhe Cezar Kunikov filloi të fundoset. Simbolike është që pikërisht para 81 viteve (14 Shkurt) u vra oficeri rus emrin e të cilit e mbante dhe anija. Aksioni i okupatorit për t’a shpëtuar rezultoi pa sukses. Lavdi Ukrainës,” theksojnë operativët e shërbimit sekret ukrainas, që realizuan dhe videon në momentin e goditjes së anijes. 

Saktësohet se fjala është për njërën prej anijeve më të reja ruse. Anija kishte në ekuipazh 87 anëtarë, dhe ka marrë pjesë në luftërat në Gjeorgji, Siri dhe Ukrainë. Në fillim të pushtimit rus në Ukrainë, Cezar Kunikov u ankorua në Berdjansk dhe pësoi dëmtime kur forcat ukrainase fundosën luftanijen ruse Saratov. 

Ndryshe, ministria ruse e Mbrojtjes ka bërë të ditur se forcat kundërajrore kanë rrëzuar gjashtë dronë në Detin e Zi. Ndërkohë Telegram ka raportuar se diku në det po del flaka, në mes të Alupkës dhe Katsivelias. 

Dy helikopterë Mi-8 gjithashtu kanë fluturuar poshtë mbi ujë përgjatë gjithë zonës. Më vonë është parë edhe helikopteri Ka-27 për kërkim dhe shpëtim.