Video/ Ulet me sukses, avioni për pasagjerë më i gjati në botë , Boeing 777X
Boeing Co ka bërë të ditur se ka përfunduar me ulje të suksesshme fluturimi provë i modelit më të ri të avionit 777X, avionit më të gjatë në botë për transportin e udhëtarëve.
Avioni 777X, versioni më i madh dhe më efikas i Boeing 777 mini-jumbo, ka fluturuar nga baza komerciale afër Seattle dje në orën 10:09, sipas orës lokale, dhe ka bërë uljen e suksesshme në orën 14. Erërat e forta kanë detyruar kompaninë që ta shtyjnë dy herë këtë fluturim provë.
Testimet e mëtutjeshme dhe certifikimi do të zgjasin tani për muaj të tërë, para se avioni të bëhet operativ në Emiratet e Bashkuara në vitin 2021.
Avioni i gjatë 77 metra
Kompania Boeing kohë më parë ka paralajmëruar se avioni më i gjatë për pasagjerë i dizajnuar për transportin e 406 njerëzve, për herë të parë do të fluturoj në fillim të këtij viti. Fillimisht ishte parashikuar që porosia e parë të përfundoj nga mesi i këtij viti, por kjo gjë nuk është e mundur për shkak të problemeve në zhvillim.
Avioni i gjatë 77 metra është shumë më i madh se parardhësit e tij 777-300ER dhe avioni Airbus A340-600. Madje pak më i gjatë edhe se avioni që aktualisht mbanë rekordin 747-8, versioni i fundit i avionit Queen of the Skies.
Falë gjatësisë së tij, avioni është dizajnuar që të transportoj prej 400 deri 425 pasagjerë në dy klasa. Numri i ulëseve do të varet nga kërkesat e kompanive ajrore.
Avioni më i gjatë në botë Boeing 777X, zyrtarisht i është prezantuar drejtuesve të kompanisë Boeing në kantierin qendror të kompanisë në Everett të Washingtonit, në muajin mars të vitit të kaluar.
Prezantimi zyrtar i avionit ishte modest me qëllim që të nderohen viktimat e avionit Boeing 737 MAX 8.
Avionët e tipiti 737 MAX janë ulur në tokë në gjithë botën me urdhër të kompanisë në muajin mars, pas dy fatkeqësive ku humbën jetën 346 persona. Hetimi ka konfirmuar se softweri dhe sensorët kanë shkaktuar fatkeqësinë sepse pilotët nuk arritën të kontrollojnë avionin.
Janë shitur 309 avionë
Avioni 777X fillimisht duhej ta realizonte fluturimin provë në verën e vitit të kaluar, por u shty për vitin 2020 për shkak të problemeve në motorët GE9X të cilët prodhohen nga General Electric. Problemet u paraqitën edhe në shtatorin e vitit të kaluar gjatë testimit përfundimtar të ngarkesës kur shpërtheu dera e avionit.
Testet përfundimtare të ngarkesës i nënshtrohen “ngarkesave dhe përpjekjeve që tejkalojnë ngarkesat e zakonshme operative”, ndërsa mbikëqyren nga Inspektorët e Drejtorisë Federale të Aviacionit, FAA, si pjesë e procedurës për certifikimin e avionit, është thënë pas incidentit.
Kompania Boeing ka bërë të ditur se deri më tani ka shitur 309 avionë të tipit 777X.
