Video/ Unaza e Re, Lulzim Basha me banorët që do t’u shemben shtëpitë…
Kryetari i Partisë Demokratike, Lulzim Basha i është përgjigjur ftesës së banorëve të zonës së Unazës së Re në Tiranë,të cilëve do t’u shemben shtëpitë dhe bizneset në kuadrin e projektit për zgjerimin e rrugës. Me këtë rast ata i shprehën shqetësimet e tyre për vlerën që i është ofruar nga qeveria, për t’u shpronësuar dhe kërkuan që qeveria t’i dëmshpërblejë me vlerën e plotë të banesave të tyre.
Pas takimit me banorët, kryetari i PD, Lulzim Basha iu është drejtuar me thirrje shqiptarëve të mbështesin me prani dhe protestë të drejtën e familjarëve që po u shemben padrejtësisht shtëpitë.
“Ajo që kam dëgjuar brenda është tronditëse. Ka një detaj, nuk ka asnjë ligj për shembjen e shtëpive, u kanë çuar lajmërim dhe u kanë vënë kryqe te dera, nuk ka asnjë ligj, akt, që tu jetë dhënë familjeve,
ti jetë dhënë kohë, ti paguhen paratë e shpronësimit dhe tu jepet kohë për të gjetur një banesë, në më pak se 48 orë u thonë ikni se do tu prishim shtëpitë. Rama dhe Veliaj ka një projekt me një grup bandash që duan të pastrojnë paratë e drogës dhe duan të ndërtojnë shumëkatëshe dhe shembin shtëpitë e mbi 300 familjeve, pa u dhënë asnjë lek dëmshpërblim,” tha Basha, pas takimit.
Ndryshe, 317 godina do të shemben në të dy anët e rrugës nga pallati me Shigjeta deri tek sheshi “Shqiponja”. Banorët e këtyre godinave të banimit dhe bizneseve prej disa ditësh janë duke protestuar dhe akuzojnë qeverinë se po bën prishje selektive të banesave, ndërkohë që kanë kundërshtuar dhe vlerën e vendosur për shpronësimin e tyre.
