Video/ Ukrainë, ushtarët e Putinit vrasin civil edhe kur dorëzohen! ZDF: Pamje autentike
Televizioni publik gjerman, ZDF, në emisionin Frontal ka publikuar pamje të realizuara me dron ku shihet se si ushtarët rus në një paralagje të Kievit vrasin një civil ukrainas i cili po dorëzohet duke ngritur duart lartë. ZDF konstaton se bëhet fjalë për krim lufte!
Pamjet e publikuara, ZDF Frontal thotë se i ka marrë nga një burim anonim në Ukrainë.
“Ishin dy pjesë të veçanta, njëra zgjatë 2 minuta, e dyta gati 4 minuta. Ajo që shihet është shokuese. Droni mbikqyrës ukrainas filmon autostradën E40, disa kilometra në perëndim të Kievit,” sqaron ZDF.
Pyetja e parë që parashtrohet pas këtyre pamjeve të frikshme është nëse pamjet janë origjnale.
“E vërteta vdes e para në luftë, dhe të gjitha palët e shfrytëzojnë për propagandë, për qëllimet e veta. Fotot mund të jenë armë,” thekson ZDF duke shtuar se ata kanë arritur të konfirmojnë autenticitetin e pamjeve nga droni.
Arritën të gjejnë njeriun që i dërgoi pamjet, dhe ai aktualisht po fshehet në një bodrum në kryeqytetin e Ukrainës.
Para luftës ai merrej me tregtimin e pajisjeve elektrike, thekson ZDF i cili e dinë dhe emrin dhe vitin e lindjes, por për shkaqe sigurie nuk i publikuan të dhënat.
Droni me të cilin u filmua kjo ngjarje është i tipit Mavic III, i cili ka kamerë profesionale por nuk është pajisje ushtarake. Në pamje shihet dhe ora kur u filmua dhe është autentike.
— frontal (@ZDFfrontal) March 16, 2022
Pamje të datës 7 Mars
Pamjet tregojnë se ngjarja është zhvilluar më 7 Mars 2022 pak pas orës 14.
“Në veri të autostradës rusët kanë marrë kontrollin në paralagjet e Kievit. Kanë përparuar në drejtim të rrugës. Droni filmon tankun rus disa metra nga pika e karburantit, tanku ka një shenjë tipike të bardhë për identifikimin e forcave ruse në Ukrainë. Para tij: makina blu, siç duket e dëmtuar nga fishekët. Ndërsa në mal afër tankut: hije të vogëla por të dukshme të ushtarëve të armatosur,” e përshkruan skenën ZDF duke saktësuar se ngjarja ka ndodhur në orën 14:16.
“Shihet qartë se makinat që lëvizin në drejtim të Kievit nuk janë ushtarake por të thjeshta, personale. Shoferët e parë i shohin tanket ruse dhe kthehen, por makina ngjyrë gri ngadalëson shpejtësinë dhe ndalon. Personi del nga makina me duart lartë dhe menjëherë ekzekutohet duke rënë nga makina. Ushtarët rus janë të ndërgjegjshëm, vijnë nga pozicionet e tyre në vendin e krimit. Mund të identifikohen si ushtar rus me shiritat e bardhë që mbajnë,” thekson ZDF duke shtuar se sipas të Drejtës Ndërkombëtare është e ndaluar të gjuash në civil, në veçanti në njerëz që dorëzohen. Me fjalë të tjera, këto pamje tregojnë se kemi të bëjmë me krim lufte.
Por krimi nuk përfundon këtu! Çfarë ndodhi me gruan dhe fëmijën e shoferit të vrarë?!
Në fund, shihet se si ushtarët rus e tërheqin zvarrë trupin e pajetë dhe nga makina e hedhin në kanal.
“Me të ndjerin ishin duke udhëtuar gruaja dhe një fëmijë. Ushtarët më pas i dërgojnë në pyllin e afërt, por se çfarë ndodhë me ta nuk shihet në këto pamje që janë filmuar me dron,” thekson Televizioni publik gjerman, ZDF.
