Video/ Xibraka, Basha: Çengeli ku rri i varur Rama me pjesëmarrjen direkte të Olsi Ramës

Përveç se simbol i bashkëqeverisjes së Ramës me krimin, kryetari i Partisë Demokratike, Lulzim Basha tha se Elbasani ka dhe një simbolikë tjetër, se këtu është edhe gjeneza e kësaj bashkëqeverisje, Xibraka, fabrika e kokainës:

“Xibraka, fabrika e kokainës e çmontuar vetëm pas ndërhyrjes së partnerëve është çengeli që mban të varur Ramën përmes pjesëmarrjes direkte të Olsi Ramës, vëllait të tij, në një ndërmarrje të shtrirë nga Kolumbia për përpunimin e kokainës,” tha Lulzim Basha duke bërë publik edhe një detaj të ri:

“Përfshirja e Olsi Ramës u fsheh nga Tahiri dhe mbeten të fshehura për shkak të Fatmir Xhafës dhe shokut të Agron Xhafës, Ard Veliut, ja pse e sabotojnë komisionin hetimor.”

Ndryshe, dje Kryetari i Komisionit Hetimor për të kontrolluar veprimet dhe mosveprimet e organeve shtetërore në parandalimin dhe goditjen e fenomenit të kultivimit dhe trafikut të lëndëve narkotike, duke përfshirë çështjen për të cilën prokuroria po heton Saimir Tahirin, Ish-ministrin e Brendshëm, Edi Paloka përmes një letre drejtuar Kryetarit të Parlamentit, Gramoz Ruçi, duke akuzuar Ministrin e Brendshëm se ka penguar qëllimisht Komisionin duke fshehur informacionin dhe dokumentat, i kërkoi shkarkimin si të Fatmir Xhafajt ashtu edhe Drejtorit të Policisë, Ardi Veliu.