VIDEO+FOTO/ Protesta para Ministrisë së Brendshme, Rama-Xhafaj-Tahiri peshqit e mëdhenj

Forumi Rinor i Partisë Demokratike dhe të rinjtë e LRI-së  u mblodhën në një protest para Ministrisë së Brendshme duke kërkuar largimin e Edi Ramës dhe Fatmir Xhafajt.

Të rinjtë e cilësuan Edi Ramën si kokën e krimit në vend, ndërsa akuzuan Fatmir Xhafajn për mbrojtjen e të vëllait të tij, Agron Xhafaj, nga dënimi i dhënë nga drejtësia italiane.

Të rinjtë kanë bërë edhe foto të ndryshme me pamjet e Ramës, Xhafajt e Tahirit si peshqit e mëdhenj të krimit.

Me thirrjet “burg per Edi Ramen”, “Xhafa ik”, “qeveri e krimit”, “E duam Shqiperine si gjithe Evropa” ata kane protestuar me pankarta ne duar.

Të rinjtë kanë vendosur një gomone me pako që simbolizon drogën, pranga ne duar dhe kanë hedhur peshq dhe letra higjenike drejt godinës së ministrisë.

“Të na bashkohen jo vetëm sot, në një kauzë që është për të ardhmen e këtij vendi e për të cuar Edi Ramën me azil politik e jo për të ikur rinia nga ky vend. Rinia të mos rri në Facebook, por të dalë dhe të protestojë. Nesër na u bashkoni sërish, ne do të jemi këtu dhe nuk do të ndalemi. Ka qenë rinia ajo që ka përmbysur sistemin më të egër diktatorial.”, tha Belind Kellici.

“I themi Edi Ramës largohu menjëherë nga Shqipëria se të rinjtë janë e ardhmja e vendit dhe ata do të vendosin”, tha Floida Kerpaci.