Vidhet Zyra elektorale e PD në Cërrik, kandidatët për deputetë: Sulm politik i banditëve të PS!

Partia Demokratike Dega Cërrik ka denoncuar vjedhjen në zyrën e saj elektorale. 

Sipas denoncimit të përfaqësuesve të PD-së, persona ende të paidentifikuar kanë hyrë në ambientet e Zyrës e cila ndodhet në një lokal të marrë me qira për qëllime fushate, dhe kanë marrë një kompjuter dhe një televizor.

Ndërkohë kandidatët për deputetë të Partisë Demokratike në Cërrik, Blendi Himçi dhe Ira Boja, deklaruan se Zyra e Degës së PD në Cërrik u bastis nga individë të lidhur me Partinë Socialiste, të cilët morën kompjuterët, televizorët dhe të gjithë dokumentet e ndjeshme, duke përfshirë edhe ato elektorale.

“Në orët e vona të natës është bastisur zyra e degës së PD Cërrik nga banditë të Partisë Socialiste, ku kanë marrë kompjuterin, televizorin dhe të gjitha dokumentet e një karakteri mjaft sensitiv të zgjedhjeve elektorale, për të marrë emrat e votuesve të sigurt dhe elementët e emrave të komisionerëve dhe janë marrë për të bërë presion ndaj personave që kanë emra në këto lista.

Frika e Partisë Socialiste për humbjen e zgjedhjeve të 11 majit ka trokitur dhe këto janë veprimet më të ulëta që PS ka përdorur me persona të cilët përdoren nga drejtuesit dhe krerët politikë, dhe që, siç e shikoni, kam konstatuar vjedhjen e materialeve me karakter sensibil.

Ne i bëjmë thirrje organeve ligjzbatuese dhe policisë së shtetit të gjejnë urgjentisht banditët, ndryshe ata do të jenë pjesë e kësaj frike politike,” tha Blendi Himçi ndërsa Ira Boja tha se është e qartë se kemi të bëjmë me një sulm politik.

“Frika ka trokitur në dyert e PS dhe ata po bëjnë krim elektoral. Ne i bëjmë thirrje policisë së shtetit të marrë masat e nevojshme për të zbardhur këtë ngjarje.

Kjo është një ngjarje mjaft sensitive dhe qytetarët, jo vetëm të Cërrikut, por edhe të Shqipërisë, nuk duhet të alarmohen, dhe krimi askund nuk duhet të mbizotërojë mbi të drejtat”.

Ndryshe, vjedhja u shënua mëngjesin e sotëm në qytetin e Cërrikut, ku rreth orës 07:40 është paraqitur një kallëzim pranë Policisë së Cërrikut nga shtetasja A. Ll., me detyrë Sekretare e Degës së Partisë Demokratike të Shqipërisë.

Njoftimi i policisë:

Rreth orës 07:40 të mëngjesit të sotëm, ka kallëzuar shtetasja A. Ll., me detyrë sekretare e degës së subjektit politik “Partia Demokratike e Shqipërisë”, Cërrik, se në ambientin e marrë me qira (lokal), për qëllime elektorale, ka konstatuar se mungonin 1 kompjuter dhe 1 televizor.

Nga këqyrja paraprake në vendngjarje nuk janë konstatuar thyerje apo dëmtime të objektit.

Në drejtimin e Prokurorisë, grupi i posaçëm hetimor po punon për të sqaruar rrethanat e rastit.