“Vidovdani” nuk do mbahet këtë vit në Gazimestan

Ceremonia tradicionale serbe e “Vidovdanit” për nder të Betejës së Kosovës, nuk do mbahet në vendin e zakonshëm, tek monumenti në Gazimestan, por në Manastirin e Graçanicës më 28 qershor.

Kështu ka bërë të ditur përmes një njoftimi Peshkopi serb Teodosije Shibaliç nga Manastiri i Deçanit.

Përmes njoftimit, Dioqeza e Rashkës dhe Prizrenit thekson se këtë e vendim e kanë marr pasi Policia e Kosovës është shprehur se nuk mund të sigurojë kushte për siguri.

“Duke marrë parasysh situatën jashtëzakonisht të vështirë në Kosovë, ku populli ynë aktualisht po jeton në një gjendje të pasigurisë dhe ndjen mungesë të të drejtave dhe lirive elementare, veçanërisht pas serisë së fundit të arrestimeve dhe keqpërdorimeve të serbëve të paraburgosur, si peshkop dioqezan, me përgjegjësi të plotë baritore, kam marrë vendimin e mëposhtëm: që ‘Vidovdani’ këtë vit të mbahet në Manastirin e Graçanicës”, thuhet në njoftim.

Dioqeza e Rashkës dhe Prizrenit tha se do të kërkojë edhe  mbrojtje shtesë nga KFOR-i gjatë festimeve të këtij viti.

Ndryshe, ceremonia e “Vidovdanit” ndonëse zyrtarisht mbahet në përkujtim të Betejës së Kosovës e cila u zhvillua në vitin 1389, në realitet paraqet rikthimin e radikalizmit serb në Kosovë me ardhjen e Slobodan Milosheviçit në pushtet, kur në 28 Qershorin e vitit 1989 u festua 600 vjetori i Betejës së Kosovës dhe filloi zyrtarisht krijimi i Serbisë së Madhe!