Viso, kujdes, Likja nuk pi cigare!
nga Agim Popoci
Skenari është i njëjtë, hetimet me përgjime dhe presion të paskrupullt, akuza bëhet gati nga SPAK, i bëhet të ditur të përndjekurit në rrugë informale, rrëfehet në Kishën e Shën Opinionit te At Blendi, GJKKO mprehë shpatën dhe i dënuari furnizohet me cigare!
Ish-Ministri i Brendshëm, Saimir Tahiri, e respektoi me korrektësi gjithë këtë skenar të Kryeministrit Edi Rama, Zv/Kryeministri Arben Ahmetaj refuzoi aromën e burgut dhe u largua nga Shqipëria para se ti afrohen ca paketa me cigare, ndërsa Ish-Presidenti Ilir Meta ndonëse rrugëtoi deri në Kishën e Shën Opinionit dhe u rrëfye para At Blendit, e bëri të qartë se nuk do të ikë nga Shqipëria ndonëse kreu i SPAK, Altin Dumani, i kishte çuar ca njerëz t’ia mbushin mendjen!
A do të realizohet deri në fund skenari i Edi Ramës për Ilir Metën dhe kujt po i dërgon mesazhe të koduara Ish-Presidenti sot kur vazhdon të dëgjohet vringëllima e prangave të Altin Dumanit dedikuar Likes ende nuk mund të thuhet me siguri, por e sigurt është se nuk është e njëjta gjë, sikur në rastet kur Edi Rama u tall me Saimir Tahirin dhe Arben Ahmetajn, ose dhe rastin e talljes me Sali Berishën!
Ilir Meta u zotua sot se edhe nga burgu do ta shpërbëjë celulën kriminale të Dum Dumanit, dhe nëse kreu i SPAK ndërsa mendon se i ka shpatullat e ngrohta nuk e kupton këtë realitet, shefi i tij Edi Rama e ka shumë të qartë!
Sot Altin Dumani mund të mbyllë sytë ndaj paligjshmërive të Edi Ramës dhe gjithë atyre që Kryeministri nuk drejton gishtin, por, çfarë është paligjshmëria dhe si drejtohet shteti në kaos me krimin, Edi Rama nuk e mësoi nga Dumani por nga Ilir Meta që nga Parku Rinia, për të vazhduar buzë Lanës, Bashkinë Tiranë e deri në momentin kur u ul në fronin e Kryeministrit.
Thënë kjo, jo për të amnistuar kreun e SPAK i cili është fajtor po aq sa Edi Rama që sot paratë e shpërdoruara të shtetit shqiptarë kanë marrë dhen, dhe Prokuroria e Posaçme tallet me ca masa sigurie për skandalin me inceneratorët dhe shpikësit e 5D në Bashkinë Tiranë, por, për ti kujtuar Altin Dumanit atë që ndërkombëtarët nuk i kanë thënë kur e kanë inkurajuar të drejtoj SPAK-un: Komunizmi vret!
Kur ta fillon jetën në këtë realitet pa broçkullat populiste me drejtësinë e re, kreu i SPAK, para se t’u thotë shqiptarëve se “çfarë thotë SPAK bënë GJKKO”, duhet ta pyes Altin Dumanin në pasqyrë se pse Prokuroria e Posaçme sot ka më pak autoritet se ditën kur u krijua?!
Dhe, pse, Ilir Meta nuk ka frikë nga burgu, dhe po nga burgu do ta shpërbëjë celulën kriminale të Dum Dumanit!
Vetëm në këtë mënyrë Altin Dumani do ta kuptoj se pse shfaqja e Likes me bllok në dorë para 700 mijë eurove të korrupsionit dhe vendimi për pafajësi nga Gjykata e Lartë, është një leksion që duhet ta ketë parasysh çdo prokuror dhe gjyqtar i drejtësisë së re, në veçanti, kur merr urdhra nga Edi Rama! Jo vetëm pse sot kemi të bëjmë me një denoncues të këtij rasti i cili ndërkohë ka vdekur, por, kemi të bëjmë edhe me një njeri i cili i nisi qindra vetë për të vdekur në Bulverad për shkak të atij blloku të korrupsionit, dhe me pronarin e po këtij blloku, Liken, bëri koalicion për të qeverisur dhe sot shfaqet si bossi i drejtësisë!
Jetesa në këtë realitet shqiptar mund t’i parashtroj pyetje Altin Dumanit pse SPAK nuk ka arrestuar asnjë ministër në detyrë përveç se Kryeministrin Edi Rama dhe Kryetarin e Bashkisë Tiranë, Erion Veliaj, si dhe të gjithë ata që nuk janë rrëfyer në Kishën e Shën Opinionit te At Blendi por te Kisha e Partisë TCH, por, kjo përgjigje i duhet atij dhe vetëm atij sepse populli tashmë nuk ka ndonjë pritshmëri!
Në fund, epilogun e kësaj drame të Kryeministrit Edi Rama duke blerë Visi cigare për Liken, jo Maks Haxhia ose Genc Gjokutaj, por, as Altin Dumani nuk do ta sheh, pavarësisht se kush e mbështetë në krye të SPAK-ut dhe që vërdallë edhe në drejtësinë e re vazhdojnë të jenë, olsët, çelajt, sadushët etj.
Sot, gjërat ndryshojnë shumë! Kujdes, Likja nuk pi cigare!
